jit gaya jit gaya

aao

ab DhūñDo mujhe

phisaDDī keh ke mujh ko chheḌne vaalo

harāo ab mujhe

haañ mujhe bhī khel lagtā thā ye sab kuchh ibtidā meñ

magar ye bhī to socho

musalsal haar koī khel hai jo khel is ko maan letā maiñ

kahāñ tak hārtā maiñ?

mire chhupne ke sab kone ujāgar ho ga.e the

bahut āsān hotā jā rahā thā DhūñDnā mujh ko

mujhe ab jītnā thā

kisī qīmat pe mujh ko jītnā thā

so maiñ ne ye kiyā

vo aahaT jo mirī dushman rahī thī aaj tak

maiñ ne usī ko maar Daalā

aur jā kar chhup gayā ḳhud qabr ke taḳhtoñ ke pīchhe

manoñ miTTī ke nīche

aao

ab DhunDo mujhe

phisaDDi keh ke mujh ko chheDne walo

harao ab mujhe

han mujhe bhi khel lagta tha ye sab kuchh ibtida mein

magar ye bhi to socho

musalsal haar koi khel hai jo khel is ko man leta main

kahan tak haarta main?

mere chhupne ke sab kone ujagar ho gae the

bahut aasan hota ja raha tha DhunDna mujh ko

mujhe ab jitna tha

kisi qimat pe mujh ko jitna tha

so main ne ye kiya

wo aahaT jo meri dushman rahi thi aaj tak

main ne usi ko mar Dala

aur ja kar chhup gaya KHud qabr ke taKHton ke pichhe

manon miTTi ke niche