jila-watan shahzad-gan ka jashn

qabr kī miTTī churā kar bhāgne vāloñ meñ ham afzal nahīñ

ham koī qātil nahīñ

bismil nahīñ

munjamid ḳhūnīñ chaTānoñ par do-zānū baiTh kar

ghūmtī suuī ke raste kī salīboñ se Tapakte

qatra qatra surḳh-rū sayyāl ko

uñgliyoñ par gin rahe haiñ

chun rahe haiñ

manzar-e-nēlofarī kī jhiil meñ

girtā huā ik āsmān-e-nūr kā zaḳhḳhār shor

ham ki apnī tishnagī ke sab zarūf

apnī apnī past-qad dahlīz par toḌ aa.e the

nāriyal ke āsmāñ andoḳhta sāyoñ tale

laḌkhaḌā kar

ātishīñ sāhil kī jaltī ret par auñdhe paḌe haiñ

ātishīñ sayyāl jab jab

jism kī sarhad pe ġhash khaa.e sipāhī kī ragoñ ko chheḌtā hai

hosh aatā hai

to chāroñ samt raushan dekhte haiñ

ik alaav be-karāñ

jis meñ tamām āsmānoñ kī ridā.eñ jal rahī haiñ

aur phir

jalte gulāboñ se ubhartī za.afrānī raushnī

ham ko salāmī de rahī hai

qabr ki miTTi chura kar bhagne walon mein hum afzal nahin

hum koi qatil nahin

bismil nahin

munjamid KHunin chaTanon par do-zanu baiTh kar

ghumti sui ke raste ki salibon se Tapakte

qatra qatra surKH-ru sayyal ko

ungliyon par gin rahe hain

chun rahe hain

manzar-e-neelofari ki jhil mein

girta hua ek aasman-e-nur ka zaKHKHar shor

hum ki apni tishnagi ke sab zaruf

apni apni past-qad dahliz par toD aae the

nariyal ke aasman andoKHta sayon tale

laDkhaDa kar

aatishin sahil ki jalti ret par aundhe paDe hain

aatishin sayyal jab jab

jism ki sarhad pe ghash khae sipahi ki ragon ko chheDta hai

hosh aata hai

to chaaron samt raushan dekhte hain

ek alaw be-karan

jis mein tamam aasmanon ki ridaen jal rahi hain

aur phir

jalte gulabon se ubharti zafrani raushni

hum ko salami de rahi hai