jin lafzon mein

jin lafzoñ meñ hamāre diloñ kī bai.ateñ haiñ kyā sirf vo lafz hamāre kuchh bhī na karne

kā kaffāra ban sakte haiñ

kyā kuchh chīḳhte mānoñ vaalī satreñ sahārā ban saktī haiñ un kā

jin kī āñkhoñ meñ us des kī had un vīrāñ sehnoñ tak hai

kaise ye sher aur kyā un kī haqīqat

nā sāhab is apne lafzoñ bhare kanastar se chullū bhar kar bhiik kisī ko de kar

ham se apne qarz nahīñ utreñge

aur ye qarz ab tak kis se aur kab utre haiñ

lākhoñ nusrat-mand hujūmoñ kī ḳhandāñ ḳhandāñ ḳhūnīñ āñkhoñ se bhare hue

tārīḳh ke chaurāhoñ par

sāhib-e-taḳht-ḳhudāvandoñ kī kaTtī gardaneñ bhī hal kar na sakīñ ye masā.il

ik saa.il ke masā.il

apne apne urūjoñ kī uftādgiyoñ meñ Duub ga.iiñ sab tahzībeñ sab falsafe…

to ab ye sab harf zabūroñ meñ jo mujallad haiñ kyā hāsil un kaa…

jab tak merā ye dukh ḳhud mere lahū kī dhaḌaktī Taksāloñ meñ Dhal ke duāoñ bharī is ik

mailī jholī meñ na khanke

jo raste ke kināre mire qadmoñ pe bichhī hai

jin lafzon mein hamare dilon ki baiaten hain kya sirf wo lafz hamare kuchh bhi na karne

ka kaffara ban sakte hain

kya kuchh chiKHte manon wali satren sahaara ban sakti hain un ka

jin ki aankhon mein us des ki had un viran sehnon tak hai

kaise ye sher aur kya un ki haqiqat

na sahab is apne lafzon bhare kanastar se chullu bhar kar bhik kisi ko de kar

hum se apne qarz nahin utrenge

aur ye qarz ab tak kis se aur kab utre hain

lakhon nusrat-mand hujumon ki KHandan KHandan KHunin aankhon se bhare hue

tariKH ke chaurahon par

sahib-e-taKHt-KHudawandon ki kaTti gardanen bhi hal kar na sakin ye masail

ek sail ke masail

apne apne urujon ki uftadgiyon mein Dub gain sab tahziben sab falsafe…

to ab ye sab harf zaburon mein jo mujallad hain kya hasil un ka…

jab tak mera ye dukh KHud mere lahu ki dhaDakti Taksalon mein Dhal ke duaon bhari is ek

maili jholi mein na khanke

jo raste ke kinare mere qadmon pe bichhi hai