jism ke andar jism ke bahar

maiñ ne zamīñ kī taptī ragoñ pe haath dhare haiñ

maiñ ne zamīñ kī taptī ragoñ se

tapte lahū ko ubalte dekhā hai

un rastoñ pe un galiyoñ pe

patthar jaisī saḳht havā ke

surḳh dhamāke dekhe haiñ

raat kī mutvarrim ghaḌiyoñ meñ

zard makānoñ ke sehnoñ meñ

lahū ko girte dekhā hai

qatra qatra qatra

qatra qatra bante bante ek samundar

ik be-pāyāñ taptā surḳh samundar

zard makānoñ kī rag rag meñ

taptā surḳh samundar

un galiyoñ kī būḌhī chhāl pe ifrītoñ ke hamle

taptī zamīñ ke sātvīñ talve tak lahrātī andhī chīḳheñ

kitnī hī zālim sadiyoñ se

andhī chīḳheñ mere tapte jism ke jalte ḳhaliyoñ

zard masāmoñ ke darroñ meñ bhaTak rahī haiñ

chīḳheñ mere jism kī ik ik rag meñ yūrish kartī haiñ

nafrat kā tīkhā lashkāra jism ko kāTtā rahtā hai

jis ke andar jism ke bāhar

ḳhuun kā andhā laavā bahtā rahtā hai

main ne zamin ki tapti ragon pe hath dhare hain

main ne zamin ki tapti ragon se

tapte lahu ko ubalte dekha hai

un raston pe un galiyon pe

patthar jaisi saKHt hawa ke

surKH dhamake dekhe hain

raat ki mutwarrim ghaDiyon mein

zard makanon ke sehnon mein

lahu ko girte dekha hai

qatra qatra qatra

qatra qatra bante bante ek samundar

ek be-payan tapta surKH samundar

zard makanon ki rag rag mein

tapta surKH samundar

un galiyon ki buDhi chhaal pe ifriton ke hamle

tapti zamin ke satwin talwe tak lahraati andhi chiKHen

kitni hi zalim sadiyon se

andhi chiKHen mere tapte jism ke jalte KHaliyon

zard masamon ke darron mein bhaTak rahi hain

chiKHen mere jism ki ek ek rag mein yurish karti hain

nafrat ka tikha lashkara jism ko kaTta rahta hai

jis ke andar jism ke bahar

KHun ka andha lawa bahta rahta hai