jism-o-jaan ka safar

tum

mujhe yūñhī rahne do

merī aahoñ ko

havā ke dosh par

yūñhī bahne do

lafz to vo bhī nahīñ

lafz to maiñ bhī nahīñ

yahāñ lafz to koī bhī nahīñ

magar ham donoñ meñ koī fāsla bhī nahīñ

na jaane kaun hai vo

jo ga.ī raat tak

mere andar jāgtā hai

ang ang meñ boltā

nas nas meñ Doltā hai

lahū lahū chīḳhtā hai

jism-o-jāñ kā ye safar kitnā dushvār hai

mujhe

din ke bāzār se ḳharīde hue

is ibn-e-ādam kī justujū hai

jo be-nishāñ rāsto par

mujhe qatl kar de

mujhe us hādse kī talāsh hai

jo mujhe abhī ḳhatm kar de

yā phir

merī ruuh kī azaañ kā

koī ta.āqub kare

duāoñ kī tafsīr meñ

pal pal nazreñ bichhā.e

vafā kī aag se raushan

charāġh-e-tūr liye

kisī dīvār ke lab se koī naġhma sunā.e

hama-vaqt mohabbat jatā.e

lekin maiñ to

us sadī ke qarz kā suud huuñ

jis kī adā.egī mumkin na ho sakegī

na ruk sakegī pighaltī mom jismoñ kī

na khankegī chūḌī na galī jāgegī

tumhāre āñgan se

utrī huī dhuup

mere āñgan tak ko pahuñchī hai

lekin mujhe yaqīn hai

ki vo phir fazāoñ meñ kho jā.egī

ik din sannāTe meñ Duub jā.egī

tum

mujhe yunhi rahne do

meri aahon ko

hawa ke dosh par

yunhi bahne do

lafz to wo bhi nahin

lafz to main bhi nahin

yahan lafz to koi bhi nahin

magar hum donon mein koi fasla bhi nahin

na jaane kaun hai wo

jo gai raat tak

mere andar jagta hai

ang ang mein bolta

nas nas mein Dolta hai

lahu lahu chiKHta hai

jism-o-jaan ka ye safar kitna dushwar hai

mujhe

din ke bazar se KHaride hue

is ibn-e-adam ki justuju hai

jo be-nishan rasto par

mujhe qatl kar de

mujhe us hadse ki talash hai

jo mujhe abhi KHatm kar de

ya phir

meri ruh ki azan ka

koi taaqub kare

duaon ki tafsir mein

pal pal nazren bichhae

wafa ki aag se raushan

charagh-e-tur liye

kisi diwar ke lab se koi naghma sunae

hama-waqt mohabbat jatae

lekin main to

us sadi ke qarz ka sud hun

jis ki adaegi mumkin na ho sakegi

na ruk sakegi pighalti mom jismon ki

na khankegi chuDi na gali jagegi

tumhaare aangan se

utri hui dhup

mere aangan tak ko pahunchi hai

lekin mujhe yaqin hai

ki wo phir fazaon mein kho jaegi

ek din sannaTe mein Dub jaegi