jitne alfaz hain sab kahe ja chuke

ek muddat huī sochte sochte

tum se kahnā hai kuchh par maiñ kaise kahūñ

aarzū hai mujhe aise alfāz kī

jo kisī ne kisī se kahe hī na hoñ

sochtā huuñ ki mauj-e-sabā ke subuk paañv meñ koī pāzeb hī Daal duuñ

chāhtā huuñ ki in titliyoñ ke paroñ meñ dhanak bāñdh duuñ

surma.ī shaam ke gesuoñ meñ bañdhī bārisheñ khol duuñ ḳhushbueñ ghol duuñ

phuul ke surḳh hoñToñ pe afshāñ rakhūñ

ḳhvāb kī maañg meñ nuur sindūr kī kahkashāñ khīñch duuñ

ik taḳhayyul kī be-rabtiyoñ ko tasalsul kī zanjīr duuñ

ḳhvāb ko jism duuñ jism ko ism duuñ

koī ta.abīr duuñ ek tasvīr duuñ aur tasvīr ko rū-ba-rū rakh ke ik harf-e-tauqīr duuñ

kyā kahūñ ye kahūñ yuuñ kahūñ par maiñ kaise kahūñ

jitne alfāz haiñ sab kahe jā chuke sab sune jā chuke

tishna iz.hār ko mo'atabar sā koī ab sahārā mile

ik kināya mile ik ishāra mile

ḳhūb-sūrat anokhī alāmat mile an-kahā an-sunā isti.āra mile

aarzū hai mujhe aise alfāz kī justujū hai mujhe aise alfāz kī

jin se patthar ko paanī kiyā jā sake

ḳhvāb ko ik haqīqat kiyā jā sake

ek zinda kahānī kiyā jā sake

sarhad-e-jāvedānī kiyā jā sake

ek muddat hui sochte sochte

tum se kahna hai kuchh par main kaise kahun

aarzu hai mujhe aise alfaz ki

jo kisi ne kisi se kahe hi na hon

sochta hun ki mauj-e-saba ke subuk panw mein koi pazeb hi Dal dun

chahta hun ki in titliyon ke paron mein dhanak bandh dun

surmai sham ke gesuon mein bandhi barishen khol dun KHushbuen ghol dun

phul ke surKH honTon pe afshan rakhun

KHwab ki mang mein nur sindur ki kahkashan khinch dun

ek taKHayyul ki be-rabtiyon ko tasalsul ki zanjir dun

KHwab ko jism dun jism ko ism dun

koi tabir dun ek taswir dun aur taswir ko ru-ba-ru rakh ke ek harf-e-tauqir dun

kya kahun ye kahun yun kahun par main kaise kahun

jitne alfaz hain sab kahe ja chuke sab sune ja chuke

tishna izhaar ko mo'atabar sa koi ab sahaara mile

ek kinaya mile ek ishaara mile

KHub-surat anokhi alamat mile an-kaha an-suna istiara mile

aarzu hai mujhe aise alfaz ki justuju hai mujhe aise alfaz ki

jin se patthar ko pani kiya ja sake

KHwab ko ek haqiqat kiya ja sake

ek zinda kahani kiya ja sake

sarhad-e-jawedani kiya ja sake