jo KHud mein tashkil ho raha hai

kabhī kabhī mujh ko jaan paḌtā hai

jaise mujh meñ

ghirā huā parbatoñ se

ḳhālī sā ik mahal ho

jahāñ kabhī

budh ke ilm kā ik ḳhazāna thā

jis jagah

shlok aur mantar māhaul meñ

nahīñ

ḳhud mire hī andar

mirī sadā meñ

himāliyā.ī havāoñ kī tarah gūñjte the

ajiib azmat ke saath maiñ yuuñ alag-thalak thā

ki jis tarah merī maut kī baat

qarnahā qarn se hai vo raaz

maiñ hī bas jis ko jāntā huuñ

maiñ apne andar vo aatmā huuñ

jise kabhī

ik aziim peshen-goī kā sail-e-be-samā.at

mahal samet āsmān meñ le uḌā thā

yā phir

maiñ ik tanāv huuñ

āsmānoñ kī samt

bachpan ke hairat-añgez ḳhvāb ke be bane mahal sā

jahāñ mire chāroñ samt rāheñ

safed ret aur barf kī

apnī apnī had se

mirī taraf baḌh rahī haiñ

jaise

maiñ devtāoñ kā huuñ vo maskan

jo sab ko apnī taraf bulātā hai aur

sab kī pahuñch se kuchh is tarah pare hai

ki jaise maiñ dekhne kī had huuñ

maiñ ek parbat huuñ

vādiyāñ jis ne baañT dī haiñ

maiñ ik guphā huuñ

jo vādiyoñ ko milā rahī hai

maiñ jaise sadiyoñ kī yātrā kī vo gahrī āvāz huuñ jo ab tak

guphā ke andar se aa rahī hai

maiñ ek bhikshū huuñ

jo kabhī kā

isī guphā meñ samā chukā hai

jo ḳhud meñ tashkīl ho rahā thā

jo ḳhud meñ tashkīl ho rahā hai

kabhi kabhi mujh ko jaan paDta hai

jaise mujh mein

ghira hua parbaton se

KHali sa ek mahal ho

jahan kabhi

budh ke ilm ka ek KHazana tha

jis jagah

shlok aur mantar mahaul mein

nahin

KHud mere hi andar

meri sada mein

himaliyai hawaon ki tarah gunjte the

ajib azmat ke sath main yun alag-thalak tha

ki jis tarah meri maut ki baat

qarnaha qarn se hai wo raaz

main hi bas jis ko jaanta hun

main apne andar wo aatma hun

jise kabhi

ek azim peshen-goi ka sail-e-be-samaat

mahal samet aasman mein le uDa tha

ya phir

main ek tanaw hun

aasmanon ki samt

bachpan ke hairat-angez KHwab ke be bane mahal sa

jahan mere chaaron samt rahen

safed ret aur barf ki

apni apni had se

meri taraf baDh rahi hain

jaise

main dewtaon ka hun wo maskan

jo sab ko apni taraf bulata hai aur

sab ki pahunch se kuchh is tarah pare hai

ki jaise main dekhne ki had hun

main ek parbat hun

wadiyan jis ne banT di hain

main ek gupha hun

jo wadiyon ko mila rahi hai

main jaise sadiyon ki yatra ki wo gahri aawaz hun jo ab tak

gupha ke andar se aa rahi hai

main ek bhikshu hun

jo kabhi ka

isi gupha mein sama chuka hai

jo KHud mein tashkil ho raha tha

jo KHud mein tashkil ho raha hai