jo log raaton ko jagte the

sitāre jitne bhī āsmāñ par

mirī tamannā ke zau-fishāñ the

zamīñ ke andar utar ga.e haiñ

jo log rātoñ ko jāgte the vo mar ga.e haiñ

vo phuul vo titliyāñ ki jin se

bahār kī dilkashī sivā thī

vo rizq-e-ḳhāshāk ban chuke the

tamām manzar tamām chehre jo dhīre dhīre sulag rahe the

so ab vo sab raakh ban chuke haiñ

maiñ raftagāñ kī udaas yādoñ ke saa.e meñ din guzārtā huuñ

agarche ḳhvāboñ kā pairahan taar taar sā hai

pa maiñ use kab utārtā huuñ

mirī sadā kā javāb ab koī bhī na degā

ye jāntā huuñ magar musalsal kisī ko ab tak pukārtā huuñ

ajiib ye khel hai ki jis ko na jīt.tā huuñ na hārtā huuñ

mirī kahānī meñ koī shai bhī na.ī nahīñ hai

ye nanhe munne hasīn ḳhvāboñ se hai ibārat

mirī kahānī meñ narm din ḳhush-gavār shāmoñ

udaas rātoñ kī ek rau hai

vajūd merā kisī diye kī haqīr lau hai

maiñ yuuñ to kahne ko aql o mantiq ke daur kā aadmī huuñ lekin

mirā ravayya hai zindagī ko guzārne kā bahut purānā

maiñ sochtā huuñ ki ik sadī qabl paidā hotā to Thiik rahtā

ki mujh se koī bhī kuchh na kahtā

jo ḳhaak kā rizq ho chuke haiñ

maiñ un zamānoñ kā nauhagar huuñ

visāl o hijrāñ kī dāstānoñ kā nauhagar huuñ

jinheñ ye duniyā hazār-hā baar sun chukī hai

sitare jitne bhi aasman par

meri tamanna ke zau-fishan the

zamin ke andar utar gae hain

jo log raaton ko jagte the wo mar gae hain

wo phul wo titliyan ki jin se

bahaar ki dilkashi siwa thi

wo rizq-e-KHashak ban chuke the

tamam manzar tamam chehre jo dhire dhire sulag rahe the

so ab wo sab rakh ban chuke hain

main raftagan ki udas yaadon ke sae mein din guzarta hun

agarche KHwabon ka pairahan tar tar sa hai

pa main use kab utarta hun

meri sada ka jawab ab koi bhi na dega

ye jaanta hun magar musalsal kisi ko ab tak pukarta hun

ajib ye khel hai ki jis ko na jitta hun na haarta hun

meri kahani mein koi shai bhi nai nahin hai

ye nanhe munne hasin KHwabon se hai ibarat

meri kahani mein narm din KHush-gawar shamon

udas raaton ki ek rau hai

wajud mera kisi diye ki haqir lau hai

main yun to kahne ko aql o mantiq ke daur ka aadmi hun lekin

mera rawayya hai zindagi ko guzarne ka bahut purana

main sochta hun ki ek sadi qabl paida hota to Thik rahta

ki mujh se koi bhi kuchh na kahta

jo KHak ka rizq ho chuke hain

main un zamanon ka nauhagar hun

visal o hijran ki dastanon ka nauhagar hun

jinhen ye duniya hazar-ha bar sun chuki hai