jogi

maiñ ruuh huuñ is vīrāne kī

jo ḳhaak bagūla phirtī hai

ik chehra is afsāne kā

be-kār jo taḌpā kartā hai

ik lāsha un armānoñ kā

be-dām jo biktā rahtā hai

maiñ bastī bastī nagar nagar

betāb tamannā.eñ le kar

ḳhālī jholī gadlā dāmāñ

har galī galī phailā.e hue

be-ḳhvāb sī suunī āñkhoñ ko

kuchh ḳhvāb na.e dikhlātā huuñ

TuuTe barbat se niklī huī

kuchh dhuneñ unheñ sunvātā huuñ

is aas meñ DhūñDhtā rahtā huuñ

ki shāyad inhīñ tānoñ se kahīñ

lai phūTe na.e afsāne kī

girdāb kī tarah se ubal paḌe

suunī dhartī armānoñ kī

main ruh hun is virane ki

jo KHak bagula phirti hai

ek chehra is afsane ka

be-kar jo taDpa karta hai

ek lasha un armanon ka

be-dam jo bikta rahta hai

main basti basti nagar nagar

betab tamannaen le kar

KHali jholi gadla daman

har gali gali phailae hue

be-KHwab si suni aankhon ko

kuchh KHwab nae dikhlata hun

TuTe barbat se nikli hui

kuchh dhunen unhen sunwata hun

is aas mein DhunDhta rahta hun

ki shayad inhin tanon se kahin

lai phuTe nae afsane ki

girdab ki tarah se ubal paDe

suni dharti armanon ki