judai ke azab ka pahla din

ga.ī rutoñ ke udaas lamhoñ

qarīb aao qarīb aao

utar ke merī ujaaḌ āñkhoñ meñ ashk aasā Tapakte jaao

mere badan kī purānī pagDanDiyoñ pe chalte

kisī musāfir kī purānī pagDanDiyoñ pe chalte

kisī musāfir kī tez-qadmī se reza reza bikharte patto

ye yaad rakhnā ki ab abad tak

tumhāre bīmār zard chehroñ pe pā.emālī kī be-nishāñ mohr lag chukī hai

havā.e sarmā kī chīra-dastī se be-niyāz-o-be-libās shāḳho

maiñ jāntā huuñ

ki tum ko aatī rutoñ kī ḳhātir

hare libādoñ kī justujū hai

na.e nagīnoñ kī aarzū hai

magar abhī to uqaab jaisī ḳhizāñ ke panje lahū meñ ġhaltāñ badan zamīñ meñ gaḌe hue haiñ

abhī shagūfoñ kī ghanTiyoñ kī sadā.eñ kānoñ ko nā-rasā haiñ

kahāñ ho tum merī ḳhvāhishoñ ke be-bāl-o-par be-gunah farishto

qarīb aao qarīb aao

qarīb itnā ki merī sāñseñ

tumhāre ujle farāḳh hāthoñ pe nam kā ik jaal sā bichhā deñ

ḳhud apnī āñkhoñ se dekh jaao

ki kab se mere laboñ pe ḳhāmoshiyoñ ke jaale tane hue haiñ

maiñ kab se phailā.e haath apne bhikāriyoñ kī tarah khaḌā huuñ

mire liye ye judā.iyoñ ke azaab chakhne kā pahlā din hai

tulūa hote hue añdhero

ġhurūb hote hue savero

bas aaj sab mujh se muñh na phero

gai ruton ke udas lamhon

qarib aao qarib aao

utar ke meri ujaD aankhon mein ashk aasa Tapakte jao

mere badan ki purani pagDanDiyon pe chalte

kisi musafir ki purani pagDanDiyon pe chalte

kisi musafir ki tez-qadmi se reza reza bikharte patto

ye yaad rakhna ki ab abad tak

tumhaare bimar zard chehron pe paemali ki be-nishan mohr lag chuki hai

hawae sarma ki chira-dasti se be-niyaz-o-be-libas shaKHo

main jaanta hun

ki tum ko aati ruton ki KHatir

hare libaadon ki justuju hai

nae naginon ki aarzu hai

magar abhi to uqab jaisi KHizan ke panje lahu mein ghaltan badan zamin mein gaDe hue hain

abhi shagufon ki ghanTiyon ki sadaen kanon ko na-rasa hain

kahan ho tum meri KHwahishon ke be-baal-o-par be-gunah farishto

qarib aao qarib aao

qarib itna ki meri sansen

tumhaare ujle faraKH hathon pe nam ka ek jal sa bichha den

KHud apni aankhon se dekh jao

ki kab se mere labon pe KHamoshiyon ke jale tane hue hain

main kab se phailae hath apne bhikariyon ki tarah khaDa hun

mere liye ye judaiyon ke azab chakhne ka pahla din hai

tulua hote hue andhero

ghurub hote hue sawero

bas aaj sab mujh se munh na phero