judai ki pahli raat

aañkh bojhal hai

magar niiñd nahīñ aatī hai

merī gardan meñ hamā.il tirī bāñheñ jo nahīñ

kisī karvaT bhī mujhe chain nahīñ paḌtā hai

sard paḌtī huī raat

māñgne aa.ī hai phir mujh se

tire narm badan kī garmī

aur darīchoñ se jhijaktī huī āhista havā

khojtī hai mire ġham-ḳhāne meñ

terī sāñsoñ kī gulābī ḳhushbū!

merā bistar hī nahīñ

dil bhī bahut ḳhālī hai

ik ḳhalā hai ki mirī ruuh meñ dahshat kī tarah utrā hai

terā nanhā sā vajūd

kaise us ne mujhe bhar rakkhā thā

tire hote hue duniyā se ta.alluq kī zarūrat hī na thī

saarī vābastagiyāñ tujh se thiiñ

tū mirī soch bhii, tasvīr bhī aur bolī bhī

maiñ tirī maañ, bhī tirī dost bhī ham-jolī bhī

tere jaane pe khulā

lafz hī koī mujhe yaad nahīñ

baat karnā hī mujhe bhuul gayā!

tū mirī ruuh kā hissa thā

mire chāroñ taraf

chāñd kī tarah se raqsāñ thā magar

kis qadar jald tirī hastī ne

mire atrāf meñ sūraj kī jagah le lī hai

ab tire gird maiñ raqsinda huuñ!

vaqt kā faisla thā

tire fardā kī rifāqat ke liye

merā imroz akelā rah jaa.e

mire bachche, mire laal

farz to mujh ko nibhānā hai magar

dekh ki kitnī akelī huuñ maiñ!

aankh bojhal hai

magar nind nahin aati hai

meri gardan mein hamail teri banhen jo nahin

kisi karwaT bhi mujhe chain nahin paDta hai

sard paDti hui raat

mangne aai hai phir mujh se

tere narm badan ki garmi

aur darichon se jhijakti hui aahista hawa

khojti hai mere gham-KHane mein

teri sanson ki gulabi KHushbu!

mera bistar hi nahin

dil bhi bahut KHali hai

ek KHala hai ki meri ruh mein dahshat ki tarah utra hai

tera nanha sa wajud

kaise us ne mujhe bhar rakkha tha

tere hote hue duniya se talluq ki zarurat hi na thi

sari wabastagiyan tujh se thin

tu meri soch bhi, taswir bhi aur boli bhi

main teri man, bhi teri dost bhi ham-joli bhi

tere jaane pe khula

lafz hi koi mujhe yaad nahin

baat karna hi mujhe bhul gaya!

tu meri ruh ka hissa tha

mere chaaron taraf

chand ki tarah se raqsan tha magar

kis qadar jald teri hasti ne

mere atraf mein suraj ki jagah le li hai

ab tere gird main raqsinda hun!

waqt ka faisla tha

tere farda ki rifaqat ke liye

mera imroz akela rah jae

mere bachche, mere lal

farz to mujh ko nibhana hai magar

dekh ki kitni akeli hun main!