judai

nigār-e-shām-e-ġham maiñ tujh se ruḳhsat hone aayā huuñ

gale mil le ki yuuñ milne kī naubat phir na aa.egī

sar-e-rāhe jo ham donoñ kahīñ mil bhī ga.e to kyā

ye lamhe phir na lauTeñge ye saa.at phir na aa.egī

ki maiñ ab sirf in guzre hue lamhoñ kā saaya huuñ

isī bāzār meñ baara baras hone ko aa.e haiñ

ki maiñ ne fastes kī tarah apnī ruuh bechī thī

masarrat kī musalsal gardish-e-yaksāñ se uktā kar

tujhe hāsil kiyā thā aur har sūrat bhulā dī thī

purāne sāz-o-sāmāñ ab mujhe rone ko aa.e haiñ

ġhazab kī tīrgī hai rāsta dekhā nahīñ jaatā

havā ke shor meñ dariyā kī maujeñ baḌhtī jaatī haiñ

zamīñ se ukhḌe jaate haiñ daraḳhtoñ ke qadam paiham

chaTāneñ ruup badle zer-e-lab kuchh paḌhtī jaatī haiñ

ab apnī uñgliyoñ kā fāsla dekhā nahīñ jaatā

jaras kī naġhmagī āvāz mātam hotī jaatī hai

vahī ma.amūl ke but haiñ vahī lamhoñ kī vīrānī

zarā sī der meñ ye dhaḌkaneñ bhī Duub jā.eñgī

mirī āñkhoñ tak aa pahuñchā hai ab bahtā huā paanī

tirī āvāz maddham aur maddham hotī jaatī hai

nigar-e-sham-e-gham main tujh se ruKHsat hone aaya hun

gale mil le ki yun milne ki naubat phir na aaegi

sar-e-rahe jo hum donon kahin mil bhi gae to kya

ye lamhe phir na lauTenge ye saat phir na aaegi

ki main ab sirf in guzre hue lamhon ka saya hun

isi bazar mein bara baras hone ko aae hain

ki main ne fastes ki tarah apni ruh bechi thi

masarrat ki musalsal gardish-e-yaksan se ukta kar

tujhe hasil kiya tha aur har surat bhula di thi

purane saz-o-saman ab mujhe rone ko aae hain

ghazab ki tirgi hai rasta dekha nahin jata

hawa ke shor mein dariya ki maujen baDhti jati hain

zamin se ukhDe jate hain daraKHton ke qadam paiham

chaTanen rup badle zer-e-lab kuchh paDhti jati hain

ab apni ungliyon ka fasla dekha nahin jata

jaras ki naghmagi aawaz matam hoti jati hai

wahi mamul ke but hain wahi lamhon ki virani

zara si der mein ye dhaDkanen bhi Dub jaengi

meri aankhon tak aa pahuncha hai ab bahta hua pani

teri aawaz maddham aur maddham hoti jati hai