jugnu

kināre jhiil ke phirtā hai jugnū

kabhī uḌtā kabhī girtā hai jugnū

havā kī god meñ ik raushnī hai

ki nannhī sham.a koī uḌ rahī hai

sitāra sā chamaktā hai fazā meñ

sharāra uḌtā phirtā hai havā meñ

koī mahtāb sī chhoTī hai goyā

sitāre kī kiran TuuTī hai goyā

añdhere meñ sunahrī tītarī hai

ki sone kī koī nannhī parī hai

harī shāḳhoñ pe jugnū chhā ga.e haiñ

zamīñ par yā sitāre aa ga.e haiñ

munavvar saare baaġh aur ban haiñ in se

añdherī Dāliyāñ raushan haiñ in se

nahīñ ārām se sote magar ye

ki uḌte phirte haiñ yuuñ raat bhar ye

kinare jhil ke phirta hai jugnu

kabhi uDta kabhi girta hai jugnu

hawa ki god mein ek raushni hai

ki nannhi shama koi uD rahi hai

sitara sa chamakta hai faza mein

sharara uDta phirta hai hawa mein

koi mahtab si chhoTi hai goya

sitare ki kiran TuTi hai goya

andhere mein sunahri titari hai

ki sone ki koi nannhi pari hai

hari shaKHon pe jugnu chha gae hain

zamin par ya sitare aa gae hain

munawwar sare bagh aur ban hain in se

andheri Daliyan raushan hain in se

nahin aaram se sote magar ye

ki uDte phirte hain yun raat bhar ye