justuju ka ehtijaj

sadā-e-ḳhush-ḳhirām thī

adā-e-dilbarī liye

mizha se tiir pheñktī huī mirī taraf ravāñ-davāñ

ḳhudā-gavāh jaise marmarīñ badan liye 'adam se koī rau meñ ho

qatār-dar-qatār sinf-hā-e-ḳhalq dekhtī huī

qazā bhī Thahr kar nazar bachā ke dekhne lagī

ye kā.enāt 'āshiqoñ ke vāste bahut baḌī nahīñ

magar zarā se fāsle ko sar kiyā to ka.ī hazār nuurī saal lag ga.e

tumhāre hijr meñ ka.ī baras guzār ke

vujūd-dar-vujūd apnā andarūñ sañvār ke

koī pahāḌ dekh kar ke nisf 'umr so liyā

ka.ī baras hue haiñ mujh se shā'irī nahīñ huī

sarosh ne batāyā thā ki chashma-e-vah.y pe tum ne band bāñdh rakkhe the

bhalā se ye bhī koī baat hai

chalo vahāñ se aa.e ho to ye batāo merā dā.imī ḳhudā kahāñ gayā

vo ātishīñ parat fazā meñ oḌh kar ke kis kī samt chal diyā

kalīm ne kahā thā vo to us ke saath hai yā vo kisī ke saath hai

magar mujhe to sirf us kī samt jānnī hai jān-e-man

glacier sadā-e-al-amāñ lagā chuke

saroñ ke bādshāh apne sar fazā meñ kho chuke

abhī ruko

shikāyateñ sunāne do

shagūfa-e-badan zarā sī der meñ nikhārnā

sada-e-KHush-KHiram thi

ada-e-dilbari liye

mizha se tir phenkti hui meri taraf rawan-dawan

KHuda-gawah jaise marmarin badan liye 'adam se koi rau mein ho

qatar-dar-qatar sinf-ha-e-KHalq dekhti hui

qaza bhi Thahr kar nazar bacha ke dekhne lagi

ye kaenat 'ashiqon ke waste bahut baDi nahin

magar zara se fasle ko sar kiya to kai hazar nuri sal lag gae

tumhaare hijr mein kai baras guzar ke

wujud-dar-wujud apna andarun sanwar ke

koi pahaD dekh kar ke nisf 'umr so liya

kai baras hue hain mujh se sha'iri nahin hui

sarosh ne bataya tha ki chashma-e-wahy pe tum ne band bandh rakkhe the

bhala se ye bhi koi baat hai

chalo wahan se aae ho to ye batao mera daimi KHuda kahan gaya

wo aatishin parat faza mein oDh kar ke kis ki samt chal diya

kalim ne kaha tha wo to us ke sath hai ya wo kisi ke sath hai

magar mujhe to sirf us ki samt jaanni hai jaan-e-man

glacier sada-e-al-aman laga chuke

saron ke baadshah apne sar faza mein kho chuke

abhi ruko

shikayaten sunane do

shagufa-e-badan zara si der mein nikhaarna