juzw aur kul

samajh lo ki jo shai nazar aa.e aur ye kahe maiñ kahāñ huuñ

kahīñ bhī nahīñ hai

samajh lo ki jo shai dikhā.ī diyā kartī hai aur dikhā.ī nahīñ detī hai

vo yahīñ hai

yahīñ hai magar ab kahāñ hai

magar ab kahāñ hai

ye kyā baat hai aise jaise abhī vo yahīñ thī

magar ab kahāñ hai

koī yaad hai yā koī dhyān hai yā koī ḳhvāb hai

na vo yaad hai aur na vo dhyān hai aur na vo ḳhvāb hai

magar phir bhī kuchh hai

magar phir bhī kuchh hai

vo ik lahar hai haañ faqat lahar hai

vo ik lahar hai aisī jaisī kisī lahar meñ bhī koī baat hī to nahīñ hai

usī baat ko ro rahā huuñ

usī baat ko ro rahā hai zamāna

zamāna agar ro rahā hai to ro.e

magar maiñ azal se tabassum hañsī qahqahoñ hī meñ paltā rahā huuñ

azal se mirā kaam hañsnā hañsānā rahā hai

to kyā jab zamāna hañsā thā to us ko hañsāyā thā maiñ ne

ye tum kah rahe ho jo rote rahe ho

agar tum ye kahte ho maiñ māntā huuñ

magar jab zamāne ko ronā rulānā milānā hai to rotā rahegā zamāna

faqat maiñ hañsūñgā

ye mumkin nahīñ hai

zamāna agar ro.e ro.ūñgā maiñ bhī

zamāna hañsegā to maiñ bhī hañsūñgā

magar ye zamāne kā hañsnā ye ronā vo shai hai nazar aa.e aur

ye kahe maiñ kahāñ huuñ kahīñ bhī nahīñ huuñ

zamāne kā hañsnā zamāne kā ronā vo shai hai

dikhā.ī diyā kartī hai aur dikhā.ī nahīñ detī hai aur yahīñ hai

maiñ hañstā chalā jā.ūñgā aur rotā chalā jā.ūñgā aur phir bhī

zamāna kahegā tū rotā rahā hai tū hañstā rahā hai

magar maiñ ye kahtā huuñ tum se ki maiñ hī vo shai huuñ

jo ab bhī nazar aa.e aur ye kahe maiñ kahāñ huuñ to phir bhī dikhā.ī

na de aur kahe maiñ kahīñ bhī nahīñ huuñ

maiñ rotā rahā thā maiñ hañstā gayā huuñ

magar tum to hañste ga.e the

bas ab tum hī ro.o.ge aur sirf

ik maiñ huuñ jo ab bhī hañstā rahūñgā

samajh lo ki jo shai nazar aae aur ye kahe main kahan hun

kahin bhi nahin hai

samajh lo ki jo shai dikhai diya karti hai aur dikhai nahin deti hai

wo yahin hai

yahin hai magar ab kahan hai

magar ab kahan hai

ye kya baat hai aise jaise abhi wo yahin thi

magar ab kahan hai

koi yaad hai ya koi dhyan hai ya koi KHwab hai

na wo yaad hai aur na wo dhyan hai aur na wo KHwab hai

magar phir bhi kuchh hai

magar phir bhi kuchh hai

wo ek lahar hai han faqat lahar hai

wo ek lahar hai aisi jaisi kisi lahar mein bhi koi baat hi to nahin hai

usi baat ko ro raha hun

usi baat ko ro raha hai zamana

zamana agar ro raha hai to roe

magar main azal se tabassum hansi qahqahon hi mein palta raha hun

azal se mera kaam hansna hansana raha hai

to kya jab zamana hansa tha to us ko hansaya tha main ne

ye tum kah rahe ho jo rote rahe ho

agar tum ye kahte ho main manta hun

magar jab zamane ko rona rulana milana hai to rota rahega zamana

faqat main hansunga

ye mumkin nahin hai

zamana agar roe rounga main bhi

zamana hansega to main bhi hansunga

magar ye zamane ka hansna ye rona wo shai hai nazar aae aur

ye kahe main kahan hun kahin bhi nahin hun

zamane ka hansna zamane ka rona wo shai hai

dikhai diya karti hai aur dikhai nahin deti hai aur yahin hai

main hansta chala jaunga aur rota chala jaunga aur phir bhi

zamana kahega tu rota raha hai tu hansta raha hai

magar main ye kahta hun tum se ki main hi wo shai hun

jo ab bhi nazar aae aur ye kahe main kahan hun to phir bhi dikhai

na de aur kahe main kahin bhi nahin hun

main rota raha tha main hansta gaya hun

magar tum to hanste gae the

bas ab tum hi rooge aur sirf

ek main hun jo ab bhi hansta rahunga