jyotishi din mahinon ka qissa suno

jyotishī din mahīnoñ kā qissa suno

jab gharoñ se nikaltī huī laḌkiyāñ apne ghar jā.eñgī

apne raste kī ho jā.eñgī

aur tahmīna-e-be-ḳhabar har galī kī ḳhabar

har galī ik na.e ghar pe jā kar uchaT jā.egī

ai merī ruuh ke bādbāñ

dukh khule pāniyoñ kā safar umr-bhar

jyotshī din mahīnoñ kā qissa suno

jyotishī roz har roz sūraj khule pāniyoñ se nikālā gayā

rose sūraj khule pāniyoñ meñ utārā gayā

jyotishī din mahīnoñ kī vahshat se āgāh maiñ

jyotishī is aziyyat se āgāh maiñ

jyotishī mere hone kā qissa suno

jyotishī saañp āñkhoñ ne dekhā to maiñ sau gayā

mor paañv ne dekhā to maiñ sau gayā

jyotishī mere sone kā qissa suno

jyotishī merī āñkhoñ meñ tahmīna-e-be-ḳhabar ke liye an-ginat ḳhvāb haiñ

ḳhvāb vahshat ke ādāb haiñ

sub.h sūraj kā farmān hai

aur sūraj khule pāniyoñ meñ utārā gayā

jyotishi din mahinon ka qissa suno

jab gharon se nikalti hui laDkiyan apne ghar jaengi

apne raste ki ho jaengi

aur tahmina-e-be-KHabar har gali ki KHabar

har gali ek nae ghar pe ja kar uchaT jaegi

ai meri ruh ke baadban

dukh khule paniyon ka safar umr-bhar

jyotshi din mahinon ka qissa suno

jyotishi roz har roz suraj khule paniyon se nikala gaya

rose suraj khule paniyon mein utara gaya

jyotishi din mahinon ki wahshat se aagah main

jyotishi is aziyyat se aagah main

jyotishi mere hone ka qissa suno

jyotishi sanp aankhon ne dekha to main sau gaya

mor panw ne dekha to main sau gaya

jyotishi mere sone ka qissa suno

jyotishi meri aankhon mein tahmina-e-be-KHabar ke liye an-ginat KHwab hain

KHwab wahshat ke aadab hain

subh suraj ka farman hai

aur suraj khule paniyon mein utara gaya