kaen kaen kawwa Ten Ten miTThu

ek Tahnī pe baiThe the miTThū miyāñ

aa gayā ek kavvā bhī uḌ kar vahāñ

aa.iye aa.iye shauq farmā.iye

mīThā amrūd hai aap bhī khā.iye

bolā kavvā ki ḳhāmosh Teñ Teñ na kar

varna maiñ phoḌ dūñgā abhī terā sar

bevaqūfoñ se maiñ baat kartā nahīñ

apne darje se nīche utartā nahīñ

kaun sā tū uqaab aur shāhīn hai

muñh lagānā tujhe merī tauhīn hai

bolīñ kavve ne jab aisī baḌ boliyāñ

to ġhusse meñ bole ye miTThū miyāñ

tū ne kyā tiir maare haiñ maiñ bhī sunūñ

terī chālākiyoñ par zarā sar dhunoñ

bolā kavvā ki o raTTū tote ye sun

merī dānish kā har shaḳhs gaatā hai gun

kar duuñ raushan abhī tere chaudah tabaq

yaad hai bachche bachche ko merā sabaq

ek din jab bahut saḳht pyāsā thā maiñ

ye samajh le ki bas adh-marā sā thā maiñ

ek maTke meñ paanī kī dekhī jhalak

choñch Daalī to pahuñchī na paanī talak

zehn ne kaam karnā shurūa kar diyā

maTkā kañkar se bharnā shurūa kar diyā

un kī ta.adād maTke meñ jab baḌh ga.ī

sat.h paanī kī uupar talak chaḌh ga.ī

maiñ ne paanī gaTā-gaT gaTā-gaT piyā

phir phudakte hue kaa.eñ kaa.eñ kiyā

dekh le kis qadar tez tarrār huuñ

kitnā chālāk huuñ kitnā hushyār huuñ

bole miTThū miyāñ maar kar qahqaha

be-vaqūfī kī bas ho ga.ī intihā

jaane maTke meñ paanī thā kab se paḌā

phir Dhaknā bhī nahīñ thā khulā thā ghaḌā

gande kañkar bhī bhartā gayā us meñ tū

pī gayā aise paanī ko phir aaḳh thū

aise paanī se lagtī haiñ bīmāriyāñ

pesh aatī haiñ kitnī hī dushvāriyāñ

ḳhud ko kahtā aql-mand-o-dānā hai tū

lekin afsos ahmaq kā naanā hai tū

tū agar gandī chīzeñ na khaa.e piye

log pāleñ tujhe tū maze se jiye

saaf hotā to ghar ghar bulāte tujhe

is tarah maar kar kyuuñ bhagāte tujhe

kavvā sunte hī ye baat rone lagā

apne par āñsuoñ se bhigone lagā

aur kahne lagā baat sach hai tirī

log karte haiñ nafrat shakl se mirī

kavvā ro ro ke jab aah bharne lagā

us pe miTThū ne ye tars khā kar kahā

chhoḌ de is takabbur baḌā.ī ko tū

apnī aadat banā le safā.ī kī tū

gañdā paanī na pī gandī chīzeñ na khā

un meñ hotā hai Derā jarāsīm kā

ye jarāsīm bīmār kar dete haiñ

achchhe ḳhāsoñ ko be-kār kar dete haiñ

yuuñ ba-zāhir thā kavvā bahut kā.iyāñ

us ko samjhā ke har baat miTThū miyāñ

uḌ ga.e apne par phaḌ.phaḌāte hue

miTThū beTe ke na.are lagāte hue

ek Tahni pe baiThe the miTThu miyan

aa gaya ek kawwa bhi uD kar wahan

aaiye aaiye shauq farmaiye

miTha amrud hai aap bhi khaiye

bola kawwa ki KHamosh Ten Ten na kar

warna main phoD dunga abhi tera sar

bewaqufon se main baat karta nahin

apne darje se niche utarta nahin

kaun sa tu uqab aur shahin hai

munh lagana tujhe meri tauhin hai

bolin kawwe ne jab aisi baD boliyan

to ghusse mein bole ye miTThu miyan

tu ne kya tir mare hain main bhi sunun

teri chaalakiyon par zara sar dhunon

bola kawwa ki o raTTu tote ye sun

meri danish ka har shaKHs gata hai gun

kar dun raushan abhi tere chaudah tabaq

yaad hai bachche bachche ko mera sabaq

ek din jab bahut saKHt pyasa tha main

ye samajh le ki bas adh-mara sa tha main

ek maTke mein pani ki dekhi jhalak

chonch Dali to pahunchi na pani talak

zehn ne kaam karna shurua kar diya

maTka kankar se bharna shurua kar diya

un ki tadad maTke mein jab baDh gai

sath pani ki upar talak chaDh gai

main ne pani gaTa-gaT gaTa-gaT piya

phir phudakte hue kaen kaen kiya

dekh le kis qadar tez tarrar hun

kitna chaalak hun kitna hushyar hun

bole miTThu miyan mar kar qahqaha

be-waqufi ki bas ho gai intiha

jaane maTke mein pani tha kab se paDa

phir Dhakna bhi nahin tha khula tha ghaDa

gande kankar bhi bharta gaya us mein tu

pi gaya aise pani ko phir aaKH thu

aise pani se lagti hain bimariyan

pesh aati hain kitni hi dushwariyan

KHud ko kahta aql-mand-o-dana hai tu

lekin afsos ahmaq ka nana hai tu

tu agar gandi chizen na khae piye

log palen tujhe tu maze se jiye

saf hota to ghar ghar bulate tujhe

is tarah mar kar kyun bhagate tujhe

kawwa sunte hi ye baat rone laga

apne par aansuon se bhigone laga

aur kahne laga baat sach hai teri

log karte hain nafrat shakl se meri

kawwa ro ro ke jab aah bharne laga

us pe miTThu ne ye tars kha kar kaha

chhoD de is takabbur baDai ko tu

apni aadat bana le safai ki tu

ganda pani na pi gandi chizen na kha

un mein hota hai Dera jarasim ka

ye jarasim bimar kar dete hain

achchhe KHason ko be-kar kar dete hain

yun ba-zahir tha kawwa bahut kaiyan

us ko samjha ke har baat miTThu miyan

uD gae apne par phaDphaDate hue

miTThu beTe ke nare lagate hue