kaenat-e-zat ka musafir

ā.īna raqs meñ hasrat kī shanāsā.ī kā

kitne chup-chāp ḳharāboñ meñ liye jaatā hai

har taraf nirḳh-zada chehroñ kī āvāzeñ haiñ

merī āvāz kahāñ thī merī āvāz kahāñ

madfan-e-vaqt se kab koī sadā aa.ī hai

ek lamha vahī lamha mirī tanhā.ī kā

zaḳhm par zaḳhm mire dil ko diye jaatā hai

phuul ke haath meñ hai raat ke mātam kā charāġh

kabhī bujhtā kabhī jaltā hai sulagtā hai kabhī

saañs se jism kā naata mirī rusvā.ī hai

ham-safar kaun huā lāla-e-sahrā.ī kā

parda-e-rāz-e-azal chaak kiye jaatā hai

sar hathelī pe sajā.e hue chalte rahnā

zinda rahne ke liye rasm rahegī kab tak

dard dariyā hai vahī dard kī gahrā.ī hai

aaina raqs mein hasrat ki shanasai ka

kitne chup-chap KHarabon mein liye jata hai

har taraf nirKH-zada chehron ki aawazen hain

meri aawaz kahan thi meri aawaz kahan

madfan-e-waqt se kab koi sada aai hai

ek lamha wahi lamha meri tanhai ka

zaKHm par zaKHm mere dil ko diye jata hai

phul ke hath mein hai raat ke matam ka charagh

kabhi bujhta kabhi jalta hai sulagta hai kabhi

sans se jism ka nata meri ruswai hai

ham-safar kaun hua lala-e-sahrai ka

parda-e-raaz-e-azal chaak kiye jata hai

sar hatheli pe sajae hue chalte rahna

zinda rahne ke liye rasm rahegi kab tak

dard dariya hai wahi dard ki gahrai hai