kaenat

maiñ kitnī sadiyoñ se tak rahā huuñ

ye kā.enāt aur is kī vus.at

tamām hairat tamām hairat

ye kyā tamāshā ye kyā samāñ hai

ye kyā ayaañ hai ye kyā nihāñ hai

athāh sāġhar hai ik ḳhalā kā

na jaane kab se na jaane kab tak

kahāñ talak hai

hamārī nazroñ kī intihā hai

jise samajhte haiñ ham falak hai

ye raat kā chhalnī chhalnī sā kaalā āsmāñ hai

ki jis meñ jugnū kī shakl meñ

be-shumār sūraj pighal rahe haiñ

shahāb-e-sāqib hai

yā hamesha kī ThanDī kaalī fazāoñ meñ

jaise aag ke tiir chal rahe haiñ

karoḌ-hā nuurī barsoñ ke fāsloñ meñ phailī

ye kahkashā.eñ

ḳhalā ghere haiñ

yā ḳhalāoñ kī qaid meñ hai

ye kaun kis ko liye chalā hai

har ek lamha

karoḌoñ mīloñ kī jo masāfat hai

in ko āḳhir kahāñ hai jaanā

agar hai in kā kahīñ koī āḳhirī Thikānā

to vo kahāñ hai

jahāñ kahīñ hai

savāl ye hai

vahāñ se aage koī zamīñ hai

koī falak hai

agar nahīñ hai

to ye nahīñ kitnī duur tak hai

maiñ kitnī sadiyoñ se tak rahā huuñ

ye kā.enāt aur is kī vus.at

tamām hairat tamām hairat

sitāre jin kī safīr kirneñ

karoḌoñ barsoñ se raah meñ hai

zamīñ se milne kī chaah meñ hai

kabhī to aa ke kareñgī ye merī āñkheñ raushan

kabhī to aa.egī mere hāthoñ meñ raushnī kā ek aisā dāman

ki jis ko thāme maiñ jā ke dekhūñgā in ḳhalāoñ ke

phaile āñgan

kabhī to mujh ko ye kā.enāt apne raaz khul ke

sunā hī degī

ye apnā āġhāz apnā anjām

mujh ko ik din batā hī degī

agar koī vaa.iz apne mimbar se

naḳhvat-āmez lahze meñ ye kahe

ki tum to kabhī samajh hī nahīñ sakoge

ki is qadar hai ye baat gahrī

to koī pūchhe

jo maiñ na samjhā

to kaun samjhā.egā

aur jis ko kabhī na koī samajh sake

aisī baat to phir fuzūl Thahrī

main kitni sadiyon se tak raha hun

ye kaenat aur is ki wusat

tamam hairat tamam hairat

ye kya tamasha ye kya saman hai

ye kya ayan hai ye kya nihan hai

athah saghar hai ek KHala ka

na jaane kab se na jaane kab tak

kahan talak hai

hamari nazron ki intiha hai

jise samajhte hain hum falak hai

ye raat ka chhalni chhalni sa kala aasman hai

ki jis mein jugnu ki shakl mein

be-shumar suraj pighal rahe hain

shahab-e-saqib hai

ya hamesha ki ThanDi kali fazaon mein

jaise aag ke tir chal rahe hain

karoD-ha nuri barson ke faslon mein phaili

ye kahkashaen

KHala ghere hain

ya KHalaon ki qaid mein hai

ye kaun kis ko liye chala hai

har ek lamha

karoDon milon ki jo masafat hai

in ko aaKHir kahan hai jaana

agar hai in ka kahin koi aaKHiri Thikana

to wo kahan hai

jahan kahin hai

sawal ye hai

wahan se aage koi zamin hai

koi falak hai

agar nahin hai

to ye nahin kitni dur tak hai

main kitni sadiyon se tak raha hun

ye kaenat aur is ki wusat

tamam hairat tamam hairat

sitare jin ki safir kirnen

karoDon barson se rah mein hai

zamin se milne ki chah mein hai

kabhi to aa ke karengi ye meri aankhen raushan

kabhi to aaegi mere hathon mein raushni ka ek aisa daman

ki jis ko thame main ja ke dekhunga in KHalaon ke

phaile aangan

kabhi to mujh ko ye kaenat apne raaz khul ke

suna hi degi

ye apna aaghaz apna anjam

mujh ko ek din bata hi degi

agar koi waiz apne mimbar se

naKHwat-amez lahze mein ye kahe

ki tum to kabhi samajh hi nahin sakoge

ki is qadar hai ye baat gahri

to koi puchhe

jo main na samjha

to kaun samjhaega

aur jis ko kabhi na koi samajh sake

aisi baat to phir fuzul Thahri