kaghaz ke phul

phuul kāġhaz ke haiñ ḳhushbū se bahut duur haiñ ye

merī maañ to unheñ be-kār chunā kartī hai

chāñdnī ho ki kaḌī dhuup kī garmī kuchh ho

merī ḳhātir tū kahāñ roz phirā kartī hai

mere malbūs mohabbat kā jo paivand bane

mujh ko us reshmī kapḌe kī zarūrat kyā hai

jo kabhī apnā kabhī ġhair kā bīmār bane

mujh ko us husn kī yalġhār se nisbat kyā hai

apne hī zauq-e-tabassum meñ giraftār-o-asīr

zard chehre pe mile ġhāza-e-gul-e-rañg kī dhuul

ġhair-mumkin hai na deñ terī nigāhoñ ko fareb

muskurāte hue lab aur ye hañste hue phuul

kyā baḌhā.eñge kabhī zīnat-e-dāmān-e-ḳhulūs

ḳhārzāroñ se ulajhnā jinheñ aatā hī na ho

jin se qaa.em na ho ḳhud apne hī jalvoñ kā vaqār

ā.īna le ke sañvarnā jinheñ aatā hī na ho

rāt-bhar jaltā rahe chāhiye mujh ko vo charāġh

phuul kāġhaz ke haiñ kuchh der meñ jal jā.eñge

tere hāthoñ ke tarāshe hue maj.hūl sanam

mere hāthoñ kī harārat se pighal jā.eñge

kyā milegā mujhe us gul ke tabassum se kabhī

jis ke chehre pe ho rañgīn sharārat kī lakīr

kyā milegā mujhe us haat kī zebā.ī se

jis pe chaḌhte hue sharmā.e hinā kī tahrīr

aise gulshan meñ kahāñ rāt-kī-rānī mahke

jis ke har goshe se katrā ke guzartī ho bahār

qāfila apnī umīdoñ kā kahāñ par Thahre

duur tak chhāyā ho jab gardish-e-daurāñ kā ġhubār

dil meñ ik vaqt-e-tarab-nāk kā armān liye

ḳhud ko yuuñ vaqf-e-ġham-o-gardish-e-hālāt na kar

jin kā da.avā hai ki haiñ tere muqaddar ke ḳhudā

merī ḳhātir to kabhī un se koī baat na kar

phuul kāġhaz ke haiñ ḳhushbū se bahut duur haiñ ye

merī maañ tū unheñ be-kār chunā kartī hai

chāñdnī ho ki kaḌī dhuup kī garmī chakkho

merī ḳhātir tū kahāñ roz phirā kartī hai

phul kaghaz ke hain KHushbu se bahut dur hain ye

meri man to unhen be-kar chuna karti hai

chandni ho ki kaDi dhup ki garmi kuchh ho

meri KHatir tu kahan roz phira karti hai

mere malbus mohabbat ka jo paiwand bane

mujh ko us reshmi kapDe ki zarurat kya hai

jo kabhi apna kabhi ghair ka bimar bane

mujh ko us husn ki yalghaar se nisbat kya hai

apne hi zauq-e-tabassum mein giraftar-o-asir

zard chehre pe mile ghaza-e-gul-e-rang ki dhul

ghair-mumkin hai na den teri nigahon ko fareb

muskuraate hue lab aur ye hanste hue phul

kya baDhaenge kabhi zinat-e-daman-e-KHulus

KHarzaron se ulajhna jinhen aata hi na ho

jin se qaem na ho KHud apne hi jalwon ka waqar

aaina le ke sanwarna jinhen aata hi na ho

raat-bhar jalta rahe chahiye mujh ko wo charagh

phul kaghaz ke hain kuchh der mein jal jaenge

tere hathon ke tarashe hue majhul sanam

mere hathon ki hararat se pighal jaenge

kya milega mujhe us gul ke tabassum se kabhi

jis ke chehre pe ho rangin shararat ki lakir

kya milega mujhe us hat ki zebai se

jis pe chaDhte hue sharmae hina ki tahrir

aise gulshan mein kahan raat-ki-rani mahke

jis ke har goshe se katra ke guzarti ho bahaar

qafila apni umidon ka kahan par Thahre

dur tak chhaya ho jab gardish-e-dauran ka ghubar

dil mein ek waqt-e-tarab-nak ka arman liye

KHud ko yun waqf-e-gham-o-gardish-e-haalat na kar

jin ka dawa hai ki hain tere muqaddar ke KHuda

meri KHatir to kabhi un se koi baat na kar

phul kaghaz ke hain KHushbu se bahut dur hain ye

meri man tu unhen be-kar chuna karti hai

chandni ho ki kaDi dhup ki garmi chakkho

meri KHatir tu kahan roz phira karti hai