kaghaz ki naw

dekho ammāñ kaisī achchhī hai mirī kāġhaz kī naav

le chalā hai saath us ko meñh ke paanī kā bahāv

band kar detā na maiñ sab mohriyoñ ke muñh agar

kis tarah paanī se bhar jaatā bhalā phir saarā ghar

merī kashtī tum zarā dekho to ik chakkar meñ hai

go ki dariyā meñ hai lekin phir bhī ghar ke ghar meñ hai

machhliyāñ is vāste āñgan ke dariyā meñ nahīñ

Dar ke merī naav se saarī kī saarī chhup ga.iiñ

achchhī ammāñ ab mujhe dariyā meñ jaane do zarā

apnī kashtī ko mujhe ḳhud hī chalāne do zarā

jā.ūñgā maiñ jab kashtī sambhāle dekhnā

tum kahogī mere nanhe naav vaale dekhnā

maiñ kahūñgā merī ammāñ kis tarah dekhūñ udhar

kyā karūñgā naav raste se bhaTak jaa.e agar

dhyān baT jaa.e to kashtī Duub jā.egī zarūr

baiTh kar kis chiiz meñ phir jā.ūñgī maiñ duur duur

achchhī ammāñ ab mujhe dariyā meñ jaane do zarā

apnī kashtī ko mujhe ḳhud hī chalāne do zarā

dekh lenā tum ki is dariyā meñ Dūbūñgā na maiñ

achchhī ammāñ der tak paanī meñ khelūñgā na maiñ

dekho amman kaisi achchhi hai meri kaghaz ki naw

le chala hai sath us ko meinh ke pani ka bahaw

band kar deta na main sab mohriyon ke munh agar

kis tarah pani se bhar jata bhala phir sara ghar

meri kashti tum zara dekho to ek chakkar mein hai

go ki dariya mein hai lekin phir bhi ghar ke ghar mein hai

machhliyan is waste aangan ke dariya mein nahin

Dar ke meri naw se sari ki sari chhup gain

achchhi amman ab mujhe dariya mein jaane do zara

apni kashti ko mujhe KHud hi chalane do zara

jaunga main jab kashti sambhaale dekhna

tum kahogi mere nanhe naw wale dekhna

main kahunga meri amman kis tarah dekhun udhar

kya karunga naw raste se bhaTak jae agar

dhyan baT jae to kashti Dub jaegi zarur

baiTh kar kis chiz mein phir jaungi main dur dur

achchhi amman ab mujhe dariya mein jaane do zara

apni kashti ko mujhe KHud hi chalane do zara

dekh lena tum ki is dariya mein Dubunga na main

achchhi amman der tak pani mein khelunga na main