kaghazi pairahan

dil-e-majbūr kā ehsās tujhe ho ki na ho

terī mahfil se kahīñ aur chalā jā.ūñgā

ab ye sochā hai tire paas nahīñ ā.ūñgā

ye mirī nazmeñ ye ġhazleñ hī sahārā hoñgī

in ke har lafz se aa.egī vafā kī ḳhushbū

in ke har lafz meñ hai jazb mirā ḳhūn-e-jigar

ek ek lafz meñ haiñ merī vafā.eñ shāmil

ek ek lafz mohabbat kā amiiñ hai merī

mere har sher meñ hai tere hī lahje kā gudāz

mere har sher meñ hai āriz-o-ruḳhsār kā rang

ghul ga.ī hai mire sheroñ meñ laboñ kī surḳhī

mere har sher meñ hai terī nigāhoñ kā ḳhumār

sandalī jism kī ḳhushbū hai mire gītoñ meñ

merī nazmoñ meñ tirī bhīgtī palkoñ kī namī

ab nigāhoñ meñ rahe dil meñ rahā koī nahīñ

mere sheroñ meñ ba-juz tere sivā koī nahīñ

rishta-e-mehr-o-vafā toḌ na denā sāthī

vaise maiñ ashkoñ se baḌh kar tujhe detā kyā thā

chand ashkoñ ke sivā paas mire kuchh bhī nahīñ

haañ ye kuchh ġhazleñ ye nazmeñ haiñ magar ai sāthī

jāntā huuñ mirī ġhazloñ se mohabbat hai tujhe

mere ehsās mirī fikr kā ḳhāliq tū hai

terī hī den hai terī hī atā hai lekin

sochtā rahtā huuñ tujh ko kahīñ rusvā na kareñ

kyoñ tire naam se mansūb kiyā thā maiñ ne

merā kyā maiñ to huuñ badnām bhī āvāra bhī

mujh ko ye fikr hai ai dost tū rusvā hogā

mere ehsās kā gar ḳhuun ho kuchh fikr na kar

merī taḳh.īl jo jal jaa.e to ehsās na kar

ye mire sher mirī nazmeñ ye ġhazleñ merī

birhā ke giit aur aurāq-e-mohabbat mere

chand bhīgī huī rātoñ meñ sulagte se payām

tujh se vābasta haiñ kuchh aisī sazā de in ko

aaj ḳhud apne hī hāthoñ se jalā de in ko

dil-e-majbur ka ehsas tujhe ho ki na ho

teri mahfil se kahin aur chala jaunga

ab ye socha hai tere pas nahin aaunga

ye meri nazmen ye ghazlen hi sahaara hongi

in ke har lafz se aaegi wafa ki KHushbu

in ke har lafz mein hai jazb mera KHun-e-jigar

ek ek lafz mein hain meri wafaen shamil

ek ek lafz mohabbat ka amin hai meri

mere har sher mein hai tere hi lahje ka gudaz

mere har sher mein hai aariz-o-ruKHsar ka rang

ghul gai hai mere sheron mein labon ki surKHi

mere har sher mein hai teri nigahon ka KHumar

sandali jism ki KHushbu hai mere giton mein

meri nazmon mein teri bhigti palkon ki nami

ab nigahon mein rahe dil mein raha koi nahin

mere sheron mein ba-juz tere siwa koi nahin

rishta-e-mehr-o-wafa toD na dena sathi

waise main ashkon se baDh kar tujhe deta kya tha

chand ashkon ke siwa pas mere kuchh bhi nahin

han ye kuchh ghazlen ye nazmen hain magar ai sathi

jaanta hun meri ghazlon se mohabbat hai tujhe

mere ehsas meri fikr ka KHaliq tu hai

teri hi den hai teri hi ata hai lekin

sochta rahta hun tujh ko kahin ruswa na karen

kyon tere nam se mansub kiya tha main ne

mera kya main to hun badnam bhi aawara bhi

mujh ko ye fikr hai ai dost tu ruswa hoga

mere ehsas ka gar KHun ho kuchh fikr na kar

meri taKHil jo jal jae to ehsas na kar

ye mere sher meri nazmen ye ghazlen meri

birha ke git aur auraq-e-mohabbat mere

chand bhigi hui raaton mein sulagte se payam

tujh se wabasta hain kuchh aisi saza de in ko

aaj KHud apne hi hathon se jala de in ko