kaghzi hai pairahan

ye be-nūr andhī siyāsat kā bāzār hai

maslahat kī dukāñ hai

shanāsā yahāñ ajnabī haiñ

masarrat ke lamhe bhī be-jān haiñ

jism-o-jāñ kī haqīqat nahīñ haiñ

riyā-kār sochoñ ke

jāmid hisāroñ meñ lipTī huī

sar-zamīn kah rahī hai

ki ye mahfil-e-tañg-dāmāñ hai

saaqī kā e.ajāz

mutrib kī āvāz

aur nāra-e-sarmadī kuchh nahīñ hai yahāñ

to bas

zauq-e-hastī kā

bedārī-e-ārzū kā asāsa sameTo

unhīñ be-navā.ī ke ġhāroñ meñ kho jaao jā kar

jahāñ kone kone meñ

har kunj meñ har-qadam par

sukūt-e-mukammal kā aaseb hai

shor-o-ġhauġhā kā jañgal hai

aur gulshan-e-nutq be-barg-o-bār-o-samar hai

ki is mahbas-e-fikr meñ ḳhayāloñ kī mahshar-ḳhirāmī

añdheroñ ujāloñ kī takrār-e-paiham nahīñ hai

isī kunj-e-be-gāñgī meñ chhupā lo dil-o-jāñ

jahāñ sahar-ḳhez bedār rūheñ

kabhī nashsha-e-mai se sarshār thiiñ jo

ḳhumār-e-tamannā gañvā kar

subuk-narm-ḳhvāboñ se dāman bachā kar

kār-gāh-e-hunar se nigāheñ churā kar

zamāne ke naqsh-e-qadam dekhte dekhte

so ga.ī haiñ

ki vo bār-e-hurriyat dīn-o-dil se

subuk-bār sī ho ga.ī haiñ

agar jān-o-dil phir bhī

be-dārī-e-ārzū

fitna-sāzī-e-haq-bīnī-o-garm-raftārī-e-justajū par musir huuñ

to dīvār-e-mahbas ke rauzan ko āñkheñ banā lo

nigāheñ ufuq par jamā lo

ye be-nur andhi siyasat ka bazar hai

maslahat ki dukan hai

shanasa yahan ajnabi hain

masarrat ke lamhe bhi be-jaan hain

jism-o-jaan ki haqiqat nahin hain

riya-kar sochon ke

jamid hisaron mein lipTi hui

sar-zamin kah rahi hai

ki ye mahfil-e-tang-daman hai

saqi ka eajaz

mutrib ki aawaz

aur nara-e-sarmadi kuchh nahin hai yahan

to bas

zauq-e-hasti ka

bedari-e-arzu ka asasa sameTo

unhin be-nawai ke ghaaron mein kho jao ja kar

jahan kone kone mein

har kunj mein har-qadam par

sukut-e-mukammal ka aaseb hai

shor-o-ghaugha ka jangal hai

aur gulshan-e-nutq be-barg-o-bar-o-samar hai

ki is mahbas-e-fikr mein KHayalon ki mahshar-KHirami

andheron ujalon ki takrar-e-paiham nahin hai

isi kunj-e-be-gangi mein chhupa lo dil-o-jaan

jahan sahar-KHez bedar ruhen

kabhi nashsha-e-mai se sarshaar thin jo

KHumar-e-tamanna ganwa kar

subuk-narm-KHwabon se daman bacha kar

kar-gah-e-hunar se nigahen chura kar

zamane ke naqsh-e-qadam dekhte dekhte

so gai hain

ki wo bar-e-hurriyat din-o-dil se

subuk-bar si ho gai hain

agar jaan-o-dil phir bhi

be-dari-e-arzu

fitna-sazi-e-haq-bini-o-garm-raftari-e-justaju par musir hun

to diwar-e-mahbas ke rauzan ko aankhen bana lo

nigahen ufuq par jama lo