kahili

sar-e-rah peḌ jāmun kā khaḌā hai

baḌā chhitnār hai saaya ghanā hai

thake haare musāfir us ke nīche

koī leTā koī baiThā huā hai

maiñ guzrā jab udhar se to ye dekhā

ki us ke nīche ik majma' lagā hai

musāfir kuchh ziyāda aa ga.e haiñ

koī kuchh aur koī kuchh boltā hai

yakāyak ek jhoñke se havā ke

pakā jāmun zamīñ par gir rahā hai

vo kaalī kaalī pakkī pakkī jāmun

jo dekhā sab kā man lalchā rahā hai

uThā kar us ko khāne lag ga.e sab

maza khāne kā bhī aane lagā hai

vahīñ ik shaḳhs bolā dūsre se

ki jāmun khāne ko jī chāhtā hai

mire muñh meñ bhī Daalo ek jāmun

mirā jī is ko chakhnā chāhtā hai

javāban dūsrā bolā musāfir

are tū bāvlā sā ho rahā hai

tujhe jāmun uThā kar maiñ ḳhilā.uñ

uThā le ḳhud qabāhat is meñ kyā hai

sunī maiñ ne jo un donoñ kī bāteñ

mirā dil ḳhuuñ ke aañsū ro paḌā hai

haiñ duniyā meñ kuchh aise log maujūd

ki jin se bojh dhartī kā baḌhā hai

jo ḳhud apnā bhalā bhī kar na paa.e

huā kab us se ġhairoñ kā bhalā hai

vo kyā pahuñchā.egā logoñ ko rāhat

jo apnī raah kā roḌā banā hai

sar-e-rah peD jamun ka khaDa hai

baDa chhitnar hai saya ghana hai

thake haare musafir us ke niche

koi leTa koi baiTha hua hai

main guzra jab udhar se to ye dekha

ki us ke niche ek majma' laga hai

musafir kuchh ziyaada aa gae hain

koi kuchh aur koi kuchh bolta hai

yakayak ek jhonke se hawa ke

paka jamun zamin par gir raha hai

wo kali kali pakki pakki jamun

jo dekha sab ka man lalcha raha hai

uTha kar us ko khane lag gae sab

maza khane ka bhi aane laga hai

wahin ek shaKHs bola dusre se

ki jamun khane ko ji chahta hai

mere munh mein bhi Dalo ek jamun

mera ji is ko chakhna chahta hai

jawaban dusra bola musafir

are tu bawla sa ho raha hai

tujhe jamun uTha kar main KHilaun

uTha le KHud qabahat is mein kya hai

suni main ne jo un donon ki baaten

mera dil KHun ke aansu ro paDa hai

hain duniya mein kuchh aise log maujud

ki jin se bojh dharti ka baDha hai

jo KHud apna bhala bhi kar na pae

hua kab us se ghairon ka bhala hai

wo kya pahunchaega logon ko rahat

jo apni rah ka roDa bana hai