kali-andhi

vo to koñpal jaisī thī

maiñ ne use kyuuñ toḌ diyā

ye koñpal kī marzī thī

par koñpal kī marzī aisī kyuuñ hotī hai

TūTne meñ lazzat kaisī hai

haath aur koñpal meñ ye gūñgā rishta kyā hai

pāgal haath nahīñ bolegā

maiñ koñpal se pūchhūñgā

koñpal koñpal kaun pukāre koñpal raanī duur

vo ab paas nahīñ aa.egī

yaad nahīñ kyā hoñToñ ne hoñToñ se kahā thā

ham to TūTne aa.e the so TuuT chale

ab ḳhvāboñ kī chhāñv se bāhar jaane do

vo raftār kī kaalī āñdhī bāhar naach rahī hogī

us āñdhī meñ vāpas aanā mushkil hai

us āñdhī meñ chhupā huā koī haath hamārā sāhil hai

vo jo kahīñ kisī an-dekhe sāhil se jā Takrā.ī

yaad mujhe kyuuñ aatī hai

jism meñ ruuh kahāñ shāmil thī

pairoñ se shabnam kyuuñ lipTī

maiñ to ghaas pe dauḌā thā

wo to konpal jaisi thi

main ne use kyun toD diya

ye konpal ki marzi thi

par konpal ki marzi aisi kyun hoti hai

TuTne mein lazzat kaisi hai

hath aur konpal mein ye gunga rishta kya hai

pagal hath nahin bolega

main konpal se puchhunga

konpal konpal kaun pukare konpal rani dur

wo ab pas nahin aaegi

yaad nahin kya honTon ne honTon se kaha tha

hum to TuTne aae the so TuT chale

ab KHwabon ki chhanw se bahar jaane do

wo raftar ki kali aandhi bahar nach rahi hogi

us aandhi mein wapas aana mushkil hai

us aandhi mein chhupa hua koi hath hamara sahil hai

wo jo kahin kisi an-dekhe sahil se ja Takrai

yaad mujhe kyun aati hai

jism mein ruh kahan shamil thi

pairon se shabnam kyun lipTi

main to ghas pe dauDa tha