kanch

thakā-hārā azal kī vus.atoñ meñ ḳhaak kā putlā

hazāroñ man kī tārīkī tale thā sākit-o-jāmid

har ik zī-rūh kī nazroñ kā markaz, maujib-e-hairat

chamakte nūriyoñ kī shaukat-e-betāb kā shāhid

ghaḌī meñ kyā huā kyuuñ is qadar miTTī ke paikar ne

ajab larza, ajab jumbish, ajab harakat se bal khāyā

khanaktī ḳhaak ne kyuuñ kāñpne kī ibtidā kar dī

na jaane reza-e-jāñ meñ samundar kyuuñ umaD aayā

kisī sayyāl mādde kā bahut shaffāf sā qatra

girā aur khub gayā, is ḳhaak ke be-laus TukḌe par

chubhan meñ ḳhaar thā lekin jalan meñ naar kī sūrat

diye raushan hue, phailī ziyā vijdān ke andar

phir ik āvāz! shāyad thā sadā-e-kun se ġhul barpā

usī sayyāl mādde se banā ik jazba-e-sozāñ

ki jis ke saath thī biphre hue ehsās kī sozish

huā us din se hī kar-e-muravvat rezish-e-pinhāñ

mohabbat kī rutūbat ne talātum-ḳhez gardish kī

surūd-e-himmat-e-ālī usī mizrāb se phūTā

bahut nāzuk, shagufta, tez-tar tāsīr thī us meñ

ki sañg-e-bad-gumānī bhī usī billor se TuuTā

usī jauhar kī jumbish se to ġhairat sar uThātī hai

sitam ke zahr kā tiryāq āḳhir ''sāñch'' bantā hai

vafā kī āñch, armānoñ kā īñdhan tez kartā hai

yahī jauhar pighaltā hai ''yaqīñ kā kāñch'' bantā hai

thaka-haara azal ki wusaton mein KHak ka putla

hazaron man ki tariki tale tha sakit-o-jamid

har ek zi-ruh ki nazron ka markaz, maujib-e-hairat

chamakte nuriyon ki shaukat-e-betab ka shahid

ghaDi mein kya hua kyun is qadar miTTi ke paikar ne

ajab larza, ajab jumbish, ajab harakat se bal khaya

khanakti KHak ne kyun kanpne ki ibtida kar di

na jaane reza-e-jaan mein samundar kyun umaD aaya

kisi sayyal madde ka bahut shaffaf sa qatra

gira aur khub gaya, is KHak ke be-laus TukDe par

chubhan mein KHar tha lekin jalan mein nar ki surat

diye raushan hue, phaili ziya wijdan ke andar

phir ek aawaz! shayad tha sada-e-kun se ghul barpa

usi sayyal madde se bana ek jazba-e-sozan

ki jis ke sath thi biphre hue ehsas ki sozish

hua us din se hi kar-e-murawwat rezish-e-pinhan

mohabbat ki rutubat ne talatum-KHez gardish ki

surud-e-himmat-e-ali usi mizrab se phuTa

bahut nazuk, shagufta, tez-tar tasir thi us mein

ki sang-e-bad-gumani bhi usi billor se TuTa

usi jauhar ki jumbish se to ghairat sar uThati hai

sitam ke zahr ka tiryaq aaKHir sanch banta hai

wafa ki aanch, armanon ka indhan tez karta hai

yahi jauhar pighalta hai yaqin ka kanch banta hai