kar-e-abas

ek pazhmurda din

jab raat kī dahlīz par

ūñghne lagtā hai

tab hī tārīkī kā sail-e-ravāñ use bahā le jaatā hai

nasoñ se himmat kā ek ek qatra

nichoḌ jaatā hai

aur zamīñ par maut kā sannāTā

hayāt kī halchal rehn rakh letā hai

magar qādir-e-mutlaq ai ḳhudā-e-vāhid

us vaqt bhī tū jaag rahā hotā hai

maiñ lamhātī maut kī chādar haTā kar

sajda-rez honā chāhtī huuñ

magar thakā huā din

mujhe tārīkī se

nikalne kā rāsta nahīñ detā

aur merī bandagī

nāqis aur adhūrī rah jaatī hai

aglī sub.h ham

ek baar phir

apnī apnī hayāt ke bache-kuchhe lamhāt

mujtam.a karte haiñ

himmat kā suud chukā kar

ḳhud ko āzād karāte haiñ

aur din kī raushnī ke izhdihām meñ

kār-e-abas meñ bah kar

phir tujh se duur ho jaate haiñ

ek pazhmurda din

jab raat ki dahliz par

unghne lagta hai

tab hi tariki ka sail-e-rawan use baha le jata hai

nason se himmat ka ek ek qatra

nichoD jata hai

aur zamin par maut ka sannaTa

hayat ki halchal rehn rakh leta hai

magar qadir-e-mutlaq ai KHuda-e-wahid

us waqt bhi tu jag raha hota hai

main lamhati maut ki chadar haTa kar

sajda-rez hona chahti hun

magar thaka hua din

mujhe tariki se

nikalne ka rasta nahin deta

aur meri bandagi

naqis aur adhuri rah jati hai

agli subh hum

ek bar phir

apni apni hayat ke bache-kuchhe lamhat

mujtama karte hain

himmat ka sud chuka kar

KHud ko aazad karaate hain

aur din ki raushni ke izhdiham mein

kar-e-abas mein bah kar

phir tujh se dur ho jate hain