kar-e-junun

kahā ik roz sūraj ne

ḳhud apne aap se

zamīñ par ḳhushk-sālī

baḌh ga.ī hai

zamīñ kī pyaas

baḌhtī jā rahī hai

sisakte khetoñ ko

vahshat-zada

in jangaloñ ko

bilaktī rahguzāroñ

pyaas se bechain vaadī ko

musalsal aah bhartī sar-zamīnoñ

thakan se chuur

insānoñ kī bastī ko

zarūrat hai

na.e dariyāoñ kī

so us ne

apnī kirnoñ kī anī se

ba-tarz-e-tesha-e-farhād

ik din

pahāḌoñ se

na.e dariyāoñ ke

sote kiye jaarī

zamīnoñ kī anā thī

yā mizāj-e-mausam-e-daurāñ

jidhar se bhī guzartā koī dariyā

use miltī vahāñ

ik be-numū miTTī kī duniyā

magar sūraj

musalsal apnī dhun meñ

vahī kār-e-mohabbat kar rahā thā

ki ik din

ik kiran sūraj se bolī

mire pur-azm

aur pur-josh sūraj

mirī nazroñ meñ

tum shāyad abhī tak

musalsal kār-e-hasrat kar rahe ho

zamīñ sahrā kī

paanī se

kahāñ sairāb hotī hai

baraste bādaloñ ke

jaane kitne qāfile guzre

na jaane kitne dariyā

dafn haiñ

in reg-zāroñ meñ

magar kufrān-e-ne.amat kī ravish

hai aaj tak qaa.em

kiran kī baat sun kar

muskurāyā mahr-e-dil-afroz

kahā phir us ne

is nannhī kiran se

mujhe tā-der

ye kār-e-junūñ to

karte rahnā hai

ki merī aañkh meñ

ik ḳhvāb

ḳhema-zan abhī tak hai

kaha ek roz suraj ne

KHud apne aap se

zamin par KHushk-sali

baDh gai hai

zamin ki pyas

baDhti ja rahi hai

sisakte kheton ko

wahshat-zada

in jangalon ko

bilakti rahguzaron

pyas se bechain wadi ko

musalsal aah bharti sar-zaminon

thakan se chur

insanon ki basti ko

zarurat hai

nae dariyaon ki

so us ne

apni kirnon ki ani se

ba-tarz-e-tesha-e-farhad

ek din

pahaDon se

nae dariyaon ke

sote kiye jari

zaminon ki ana thi

ya mizaj-e-mausam-e-dauran

jidhar se bhi guzarta koi dariya

use milti wahan

ek be-numu miTTi ki duniya

magar suraj

musalsal apni dhun mein

wahi kar-e-mohabbat kar raha tha

ki ek din

ek kiran suraj se boli

mere pur-azm

aur pur-josh suraj

meri nazron mein

tum shayad abhi tak

musalsal kar-e-hasrat kar rahe ho

zamin sahra ki

pani se

kahan sairab hoti hai

baraste baadalon ke

jaane kitne qafile guzre

na jaane kitne dariya

dafn hain

in reg-zaron mein

magar kufran-e-neamat ki rawish

hai aaj tak qaem

kiran ki baat sun kar

muskuraya mahr-e-dil-afroz

kaha phir us ne

is nannhi kiran se

mujhe ta-der

ye kar-e-junun to

karte rahna hai

ki meri aankh mein

ek KHwab

KHema-zan abhi tak hai