karwan-e-hayat

jo shor din kā thamā ba-mushkil

udaas rātoñ kī chāñdnī meñ

sitāre pichhlī pahar ye bole

sañbhal ke apnā uThāo ḳhema

ki dasht-e-ġhurbat meñ muntazir haiñ

hazāroñ ḳhūñ-ḳhār lāv-lashkar

liye halākat ke sāz-o-sāmāñ

haiñ ghaat meñ baiThe kārvāñ ke

jo shab ko guzre to maar Dāleñ

jo din ko guzre to rauñd Dāleñ

na.ī umangoñ kī raushnī meñ

ġhurūr-e-azm-e-javān ko le kar

husūl-e-manzil kī aarzū meñ

charāġh-e-ulfat kī lau baḌhā.e

hisār-e-sahrā ubuur karke

jo kārvān-e-hayāt pahuñchā

fazā meñ jhamkā vo nuur ban kar

ufuq pe ubhrā hilāl ban kar

hasīn rātoñ kī chāñdnī meñ

chamak uThā hai damak uThā hai

hazāroñ ḳhūñ-ḳhār lāv-lashkar

liye halākat ke sāz-o-sāmāñ

jo muntazir the vo so ga.e haiñ

vo rāh-e-manzil ko kho ga.e haiñ

ye kārvān-e-hayāt apnā

ravāñ-davāñ hai ravāñ-davāñ hai

jo shor din ka thama ba-mushkil

udas raaton ki chandni mein

sitare pichhli pahar ye bole

sanbhal ke apna uThao KHema

ki dasht-e-ghurbat mein muntazir hain

hazaron KHun-KHar law-lashkar

liye halakat ke saz-o-saman

hain ghat mein baiThe karwan ke

jo shab ko guzre to mar Dalen

jo din ko guzre to raund Dalen

nai umangon ki raushni mein

ghurur-e-azm-e-jawan ko le kar

husul-e-manzil ki aarzu mein

charagh-e-ulfat ki lau baDhae

hisar-e-sahra ubur karke

jo karwan-e-hayat pahuncha

faza mein jhamka wo nur ban kar

ufuq pe ubhra hilal ban kar

hasin raaton ki chandni mein

chamak uTha hai damak uTha hai

hazaron KHun-KHar law-lashkar

liye halakat ke saz-o-saman

jo muntazir the wo so gae hain

wo rah-e-manzil ko kho gae hain

ye karwan-e-hayat apna

rawan-dawan hai rawan-dawan hai