kash

kaash nūr-e-sahar kī koī kiran

zulf se kartī mujh ko ham-āġhosh

dil meñ jal uThtī mish.al-e-ummīd

duur hotī siyāhī-e-ġham-dosh

kaash mil jaatā naunihāl koī

mujh ko ḳhush rahnā jo sikhā detā

taaki maiñ hālat-e-alam meñ bhī

jhūmtā gaatā muskurā detā

kaash koī hasīn doshīza

rāz-e-ma.asūmiyat batā detī

dil ko dho kar havas ke dhabboñ se

husn-o-ulfat se jagmagā detī

kaash mard-e-javāñ koī miltā

aur vo soz-e-dil atā kartā

jis se maiñ maut se laḌātā aañkh

aur jiine kā haq adā kartā

kaash piirī vo pur-shikoh mile

vaqt jis ko shikast de na sake

jis kī vo chitvanoñ meñ azm-e-shabāb

kam-sinī yaad aa.e jab vo hañse

kaash tāroñ kā tābnāk jamāl

jān-o-tan meñ mire samā jaatā

duur ho jaatī ġham kī tārīkī

jis taraf ho ke maiñ guzar jaatā

kash nur-e-sahar ki koi kiran

zulf se karti mujh ko ham-aghosh

dil mein jal uThti mishal-e-ummid

dur hoti siyahi-e-gham-dosh

kash mil jata naunihaal koi

mujh ko KHush rahna jo sikha deta

taki main haalat-e-alam mein bhi

jhumta gata muskura deta

kash koi hasin doshiza

raaz-e-masumiyat bata deti

dil ko dho kar hawas ke dhabbon se

husn-o-ulfat se jagmaga deti

kash mard-e-jawan koi milta

aur wo soz-e-dil ata karta

jis se main maut se laData aankh

aur jine ka haq ada karta

kash piri wo pur-shikoh mile

waqt jis ko shikast de na sake

jis ki wo chitwanon mein azm-e-shabab

kam-sini yaad aae jab wo hanse

kash taron ka tabnak jamal

jaan-o-tan mein mere sama jata

dur ho jati gham ki tariki

jis taraf ho ke main guzar jata