kash samajhdar na banun

tajraba-kār zehn to sab samajh jaatā hai

zehn meñ sochoñ ko band kar ke

taalā Daal duuñ

chālāk āñkheñ to sab kuchh taaḌ letī haiñ

in par lā-ilmī ke shīshe chaḌhā duuñ

apne hassās dil ko

zarā ḳhātir meñ na lā.ūñ

maazī kā tamām mushāhida aur tajraba

jo darj hai zehn par

use miTā Dālūñ

merī aql mere liye azaab ban ga.ī hai

kaash samajhdār na banūñ

siskī aur qahqaha

maiñ apne paañv tale se jannat nikāl kar

baḌī ḳhushī se tumheñ sauñpne ke liye tayyār huuñ

maiñ apne paañv meñ bañdhī grihastī kī beḌiyoñ ko

bas thoḌā sā Dhīlā kar rahī huuñ

ziyāda duur nahīñ jā.ūñgī

ek qahqaha lagā kar ek siskī bhar kar

yā ek nazm likh kar lauT ā.ūñgī

maiñ āzād aurat huuñ lekin

agar mere bachchoñ ke bāloñ meñ līkheñ paḌ jaa.eñ

un kī gardan par pasīna milī miTTī nazar aa.e

mere khānoñ meñ masālahoñ kī tartīb gaḌbaḌ ho jaa.e

bachchoñ ke home-work kī copy par

not-done likhā huā aa jaa.e

ghar aa.e mehmānoñ ko ḳhush-āmdīd kahte hue

ek cup chaa.e bhī na pilā sakūñ

office se lauTte hue thake hue shauhar se

hāl-ahvāl bhī na pūchhūñ

to merī sāñseñ ghuTTī huī

aur qahqaha phaTī phaTī āñkheñ

aur nazm adhūrā ḳhvāb lagtī hai

ḳhudā ne nubuvvat atā karte hue imaam banāte hue

puurī qalandarī atā karte hue

mujh par e'tibār nahīñ kiyā thā

puurī qaum ko a.alā nasl dene kī zimmedārī

faqat merī hai

is aa.alī mansab par kaam karte karte

maiñ thak bhī to saktī huuñ

merī ittifāqī ruḳhsat manzūr ho chukī hai

maiñ jā rahī huuñ ek siskī bharne ek qahqaha lagāne

aur ek nazm likhne ke liye

chhuTTī aḳhlāqī taur par manzūr hone ke bāvajūd

ghar kī har chiiz ko mujh se shikāyat

kyuuñ hai

bachchoñ ke chehre par ġhussa dekh kar sochtī huuñ

qahqaha ayyāshī aur siskī yā aas hai

aur nazm paañv meñ chubhā huā kāñch kā TukḌā hai

merī maañ kahtī hai

tum mujh se achchhī maañ nahīñ ho

tum ajab ho ghar shauhar aur bachchoñ ke alāva

aur bhī kuchh chāhtī ho

merī beTī mere haath se qalam chhīn kar

kahtī hai french-fry banā kar do

maiñ sochtī huuñ

merī beTī ko bhī jab

ek qahqahe nazm yā tasvīr ke liye

apnī zindagī kī tijorī se

kuchh pal darkār hoñge

to maiñ use kyā mashvara dūñgī

qahqaha bachpan kī bichhḌī huī sakhī

siskī hāthoñ se uḌtā huā panchhī

aur nazm gunāh hai

tajraba-kar zehn to sab samajh jata hai

zehn mein sochon ko band kar ke

tala Dal dun

chaalak aankhen to sab kuchh taD leti hain

in par la-ilmi ke shishe chaDha dun

apne hassas dil ko

zara KHatir mein na laun

mazi ka tamam mushahida aur tajraba

jo darj hai zehn par

use miTa Dalun

meri aql mere liye azab ban gai hai

kash samajhdar na banun

siski aur qahqaha

main apne panw tale se jannat nikal kar

baDi KHushi se tumhein saunpne ke liye tayyar hun

main apne panw mein bandhi grihasti ki beDiyon ko

bas thoDa sa Dhila kar rahi hun

ziyaada dur nahin jaungi

ek qahqaha laga kar ek siski bhar kar

ya ek nazm likh kar lauT aaungi

main aazad aurat hun lekin

agar mere bachchon ke baalon mein likhen paD jaen

un ki gardan par pasina mili miTTi nazar aae

mere khanon mein masalahon ki tartib gaDbaD ho jae

bachchon ke home-work ki copy par

not-done likha hua aa jae

ghar aae mehmanon ko KHush-amdid kahte hue

ek cup chae bhi na pila sakun

office se lauTte hue thake hue shauhar se

haal-ahwal bhi na puchhun

to meri sansen ghuTTi hui

aur qahqaha phaTi phaTi aankhen

aur nazm adhura KHwab lagti hai

KHuda ne nubuwwat ata karte hue imam banate hue

puri qalandari ata karte hue

mujh par e'tibar nahin kiya tha

puri qaum ko aala nasl dene ki zimmedari

faqat meri hai

is aaali mansab par kaam karte karte

main thak bhi to sakti hun

meri ittifaqi ruKHsat manzur ho chuki hai

main ja rahi hun ek siski bharne ek qahqaha lagane

aur ek nazm likhne ke liye

chhuTTi aKHlaqi taur par manzur hone ke bawajud

ghar ki har chiz ko mujh se shikayat

kyun hai

bachchon ke chehre par ghussa dekh kar sochti hun

qahqaha ayyashi aur siski ya aas hai

aur nazm panw mein chubha hua kanch ka TukDa hai

meri man kahti hai

tum mujh se achchhi man nahin ho

tum ajab ho ghar shauhar aur bachchon ke alawa

aur bhi kuchh chahti ho

meri beTi mere hath se qalam chhin kar

kahti hai french-fry bana kar do

main sochti hun

meri beTi ko bhi jab

ek qahqahe nazm ya taswir ke liye

apni zindagi ki tijori se

kuchh pal darkar honge

to main use kya mashwara dungi

qahqaha bachpan ki bichhDi hui sakhi

siski hathon se uDta hua panchhi

aur nazm gunah hai