kawak

sab āñkheñ Tāñgoñ meñ jaḌī haiñ

riiḌh kī haDDī ke mankoñ meñ kaan lage haiñ

naaf ke uupar ro.eñ ro.eñ meñ ek zabāñ hai

patlūneñ saarī āvāzeñ sun letī haiñ

do patlūneñ jhagaḌ rahī haiñ

''itnī qīmat kyuuñ letī ho tum meñ aisī kyā ḳhūbī hai''

kaise gāhak ho tum āḳhir mol badan kā de sakte ho

patī-vartā kā mol tumhāre paas nahīñ hai

chust nukīlā brazier ye chīḳh rahā hai

sharm nahīñ aatī kuttoñ ko charch ke aage khaḌe hue haiñ

rustam Tharra piye khaḌā hai bus-stop kī chhat ke nīche

aur sohrāb se pūchh rahā hai

''beTā maal kahāñ miltā hai?''

mandir kī chaukhaT par baiThī andhī āñkheñ

aate jaate autāroñ kī ḳhufiya jebeñ taak rahī haiñ

haspatāl ke ūñche nīche zīnoñ par ik ik murde ko

gāñdhī jī donoñ hāthoñ se injection dete phirte haiñ

washington vietnam meñ baiThā barham-putr ke paanī ko whiskey ke jaam meñ ghol rahā hai

london lanka kī saḌkoñ pe sar nivḌhā.e ghuum rahā hai

kāñgoñ āvāra phirtā hai paris ke gande chakloñ meñ

budh ke TūTe-phūTe but ke sar par būḌhā kargas

murdoñ kī majlis meñ baiThā apnī biptā sunā rahā hai

masjid ke saa.e meñ baiThā kam-sin gīdaḌ

us kī gavāhī meñ kahtā hai

bechāra kam-sin hai us kī choñch se ab tak

duudh kī ḳhushbū sī aatī hai

uupar niile khule gagan meñ

ek kabūtar apnī choñch meñ ik zaitūn kī shāḳh liye uḌtā phirtā hai

aur us shāḳh ke donoñ jānib

atom bomb ke paat lage haiñ

insāñ kā dāyāñ baazū ik barg-e-ḳhizāñ kī tarah laraz kar TuuT rahā hai

aur us ke baa.eñ baazū par koh-e-himala dharā huā hai

jaane phir bhī vo talvār kī dhaar pe kaise chal saktā hai

maiñ is bhiiḌ meñ chaurāhe par tanhā baiThā soch rahā huuñ

duniyā isrāfīl ke pahle suur ke ba.ad yūñhī lagtī hai

''gas ke kamre meñ'' shāyad yūñhī hotā hai

pop paal kī Topī mere bheje meñ dhañstī jaatī hai

sab aankhen Tangon mein jaDi hain

riDh ki haDDi ke mankon mein kan lage hain

naf ke upar roen roen mein ek zaban hai

patlunen sari aawazen sun leti hain

do patlunen jhagaD rahi hain

itni qimat kyun leti ho tum mein aisi kya KHubi hai

kaise gahak ho tum aaKHir mol badan ka de sakte ho

pati-warta ka mol tumhaare pas nahin hai

chust nukila brazier ye chiKH raha hai

sharm nahin aati kutton ko charch ke aage khaDe hue hain

rustam Tharra piye khaDa hai bus-stop ki chhat ke niche

aur sohrab se puchh raha hai

beTa mal kahan milta hai?

mandir ki chaukhaT par baiThi andhi aankhen

aate jate autaron ki KHufiya jeben tak rahi hain

haspatal ke unche niche zinon par ek ek murde ko

gandhi ji donon hathon se injection dete phirte hain

washington wietnam mein baiTha barham-putr ke pani ko whiskey ke jam mein ghol raha hai

london lanka ki saDkon pe sar niwDhae ghum raha hai

kangon aawara phirta hai paris ke gande chaklon mein

budh ke TuTe-phuTe but ke sar par buDha kargas

murdon ki majlis mein baiTha apni bipta suna raha hai

masjid ke sae mein baiTha kam-sin gidaD

us ki gawahi mein kahta hai

bechaara kam-sin hai us ki chonch se ab tak

dudh ki KHushbu si aati hai

upar nile khule gagan mein

ek kabutar apni chonch mein ek zaitun ki shaKH liye uDta phirta hai

aur us shaKH ke donon jaanib

atom bomb ke pat lage hain

insan ka dayan bazu ek barg-e-KHizan ki tarah laraz kar TuT raha hai

aur us ke baen bazu par koh-e-himala dhara hua hai

jaane phir bhi wo talwar ki dhaar pe kaise chal sakta hai

main is bhiD mein chaurahe par tanha baiTha soch raha hun

duniya israfil ke pahle sur ke baad yunhi lagti hai

gas ke kamre mein shayad yunhi hota hai

pop pal ki Topi mere bheje mein dhansti jati hai