kazib farar

aaj maiñ ḳhud se bahut duur nikal aayā huuñ

apne jazboñ se pare

apne ḳhayāloñ se pare

apnī yādoñ kī virāsat se pare

aaj maiñ ḳhud se bahut duur nikal aayā huuñ

duur itnā ki jahāñ

koī nahīñ duur talak

koī hamdard nahīñ

koī bhī dam-sāz nahīñ

sirf TuuTe hue rishtoñ kī sulagtī huī ret

merī āñkhoñ ke samundar kī taraf uḌtī hai

duur tak gum-shuda lamhāt kī qabroñ pe

udāsī ke diye jalte haiñ

koī rasta koī manzil na kisī samt safar kā imkān

vāpsī kī sabhī rāheñ masdūd

sirf ik jhūTī anā hai

jo na.e ḳhvāb dikhātī hai mujhe

ḳhvāb aise jinheñ ta.abīr se Dar lagtā hai

ḳhvāb aise

jinheñ biite hue lamhāt kī sachchā.ī se ḳhauf aatā hai

aaj maiñ ḳhud se

bahut duur nikal aayā huuñ

phir bhī lagtā hai

koī mujh ko pukāre

to palaT jā.ūñ maiñ

apne jazboñ kī taraf

apne biite hue lamhoñ kī taraf

apnī taraf

apne badan meñ vāpas

aaj main KHud se bahut dur nikal aaya hun

apne jazbon se pare

apne KHayalon se pare

apni yaadon ki wirasat se pare

aaj main KHud se bahut dur nikal aaya hun

dur itna ki jahan

koi nahin dur talak

koi hamdard nahin

koi bhi dam-saz nahin

sirf TuTe hue rishton ki sulagti hui ret

meri aankhon ke samundar ki taraf uDti hai

dur tak gum-shuda lamhat ki qabron pe

udasi ke diye jalte hain

koi rasta koi manzil na kisi samt safar ka imkan

wapsi ki sabhi rahen masdud

sirf ek jhuTi ana hai

jo nae KHwab dikhati hai mujhe

KHwab aise jinhen tabir se Dar lagta hai

KHwab aise

jinhen bite hue lamhat ki sachchai se KHauf aata hai

aaj main KHud se

bahut dur nikal aaya hun

phir bhi lagta hai

koi mujh ko pukare

to palaT jaun main

apne jazbon ki taraf

apne bite hue lamhon ki taraf

apni taraf

apne badan mein wapas