kabaad-KHana

ik din apne kamre meñ maiñ

baiThā baiThā soch rahā thā

jitnī haiñ be-kār kī chīzeñ

sab ko aaj maiñ yakjā kar luuñ

aur kabāḌī ko de aa.uuñ

ghar meñ ik kamra hai jahāñ par

bahut sī chīzeñ paḌīñ huī haiñ

jis meñ

mere kaam kā kuchh bhī nahīñ hai

ik lāThī hai ik baTva hai

katthe chūne kī Dibiyā hai

kahīñ sarautā paḌā huā hai

Tañgī hai kone meñ ik chhatrī kaalī kaalī

jis ko chūhoñ ne qatra hai jagah jagah se

ik lakḌī kī kursī bhī hai

būḌhī sī aur lañgḌī-lūlī

is kamre ke ik kone meñ

ik chaupā.ī paḌī huī hai

apnī qismat ko rotī hai

bilkul us ke baazū meñ hī

būḌhā sā ik taḳht rakhā hai

kiiḌe jis ko chaaT raheñ haiñ

taḳht ke aage bilkul aage

chīte kī ik khaal paḌī hai

bhūñsā bhar ke rakhā huā thā jis ke andar

ab to vo chūhoñ kā ek mohalla hai

kuchh hirno ke sar bhī haiñ dīvār pe laTke ab tak

jin ke uupar ab chiḌiyoñ ne apne apne tāj-mahal ta.amīr kiye hai

kuchh talvāreñ ḳhuuñ kī pyāsī pyaas bujhāne taḌap rahīñ haiñ

ik tote kā piñjra bhī hai

ek surāhī rakkhī huī hai

ik bīmār sā huqqa bhī hai

khāñstā rahtā hai jo ab

shāyad cancer ne us ko bhī jakḌā hai

ik lakḌī kī almārī bhī kone meñ ḳhāmosh khaḌī hai

jis meñ kuchh bosīda kapḌe rakkhe hue haiñ

ik sandūq hai jis ke andar kuchh zevar haiñ

jinkī qīmat ab bāzār meñ kuchh bhī nahīñ

kuchh german aur kāñse pītal ke bartan bhī rakkhe haiñ

ek tijorī bhī rakkhī hai

jis ko dekh ke ab tak saarī chīzeñ jaltī haiñ

ik nā-bīnā chashma bhī hai

ik pagḌī bhī rakkhī huī hai

kuchh juute chappal bhī haiñ jo

auñdhe chitte leTe haiñ

TūTe-phūTe se ik do haath ke pañkhe bhī haiñ

aur ik taaq meñ chand kitābeñ

bhūkī pyāsī chīkh rahīñ haiñ

ik kone meñ kuchh tasvīreñ paḌī huī haiñ

mere purkhoñ kī tasvīreñ

jin ke uupar dhul jamī hai

purkhoñ kī ye shān-o-shaukat

ik kamre meñ band paḌī hai

ek din apne kamre mein main

baiTha baiTha soch raha tha

jitni hain be-kar ki chizen

sab ko aaj main yakja kar lun

aur kabaDi ko de aaun

ghar mein ek kamra hai jahan par

bahut si chizen paDin hui hain

jis mein

mere kaam ka kuchh bhi nahin hai

ek laThi hai ek baTwa hai

katthe chune ki Dibiya hai

kahin sarauta paDa hua hai

Tangi hai kone mein ek chhatri kali kali

jis ko chuhon ne qatra hai jagah jagah se

ek lakDi ki kursi bhi hai

buDhi si aur langDi-luli

is kamre ke ek kone mein

ek chaupai paDi hui hai

apni qismat ko roti hai

bilkul us ke bazu mein hi

buDha sa ek taKHt rakha hai

kiDe jis ko chaT rahen hain

taKHt ke aage bilkul aage

chite ki ek khaal paDi hai

bhunsa bhar ke rakha hua tha jis ke andar

ab to wo chuhon ka ek mohalla hai

kuchh hirno ke sar bhi hain diwar pe laTke ab tak

jin ke upar ab chiDiyon ne apne apne taj-mahal tamir kiye hai

kuchh talwaren KHun ki pyasi pyas bujhane taDap rahin hain

ek tote ka pinjra bhi hai

ek surahi rakkhi hui hai

ek bimar sa huqqa bhi hai

khansta rahta hai jo ab

shayad cancer ne us ko bhi jakDa hai

ek lakDi ki almari bhi kone mein KHamosh khaDi hai

jis mein kuchh bosida kapDe rakkhe hue hain

ek sanduq hai jis ke andar kuchh zewar hain

jinki qimat ab bazar mein kuchh bhi nahin

kuchh german aur kanse pital ke bartan bhi rakkhe hain

ek tijori bhi rakkhi hai

jis ko dekh ke ab tak sari chizen jalti hain

ek na-bina chashma bhi hai

ek pagDi bhi rakkhi hui hai

kuchh jute chappal bhi hain jo

aundhe chitte leTe hain

TuTe-phuTe se ek do hath ke pankhe bhi hain

aur ek taq mein chand kitaben

bhuki pyasi chikh rahin hain

ek kone mein kuchh taswiren paDi hui hain

mere purkhon ki taswiren

jin ke upar dhul jami hai

purkhon ki ye shan-o-shaukat

ek kamre mein band paDi hai