kabhi socha bhi hai tumne

kabhī sochā bhī hai tum ne

tumhārī zaat ke andar

us ek ehsās ke andar

tumhārī ruuh se ho kar

tumhārī nabz meñ

dhaḌkan meñ

in aatī jaatī sāñsoñ meñ

kabhī maddham havāoñ meñ

kabhī sunsān rastoñ meñ

koī jugnū chamaktā hai

aur us kī raushnī meñ tum

achānak kho se jaate ho

kabhī ḳhushbū kī sūrat meñ

rag-e-jāñ meñ

shah-e-rag meñ

vo yuuñ tahlīl hotā hai

nazar kuchh bhī nahīñ aatā

magar jab kore kāġhaz par

qalam ko haath meñ le kar

ġhazal kahne ko hote ho

to vo mānūs sī ḳhushbū

tumhāre gird ek haala banātī hai

muqaddas dā.ere meñ qaid kartī hai

to vo alfāz ko kāġhaz pe

motī se chamakte haiñ

isī mānūs sī ḳhushbū se

jaane kyuuñ mahakte haiñ

tumhāre zehn aur dil meñ

sukūñ sā phail jaatā hai

magar tum kab ye samjhoge

mo.attar kar rahī hai jo

tumhārī ruuh meñ bas kar

vo tum meñ zam huī hai jo

tumhīñ meñ rahnā chāhtī hai

kabhi socha bhi hai tum ne

tumhaari zat ke andar

us ek ehsas ke andar

tumhaari ruh se ho kar

tumhaari nabz mein

dhaDkan mein

in aati jati sanson mein

kabhi maddham hawaon mein

kabhi sunsan raston mein

koi jugnu chamakta hai

aur us ki raushni mein tum

achanak kho se jate ho

kabhi KHushbu ki surat mein

rag-e-jaan mein

shah-e-rag mein

wo yun tahlil hota hai

nazar kuchh bhi nahin aata

magar jab kore kaghaz par

qalam ko hath mein le kar

ghazal kahne ko hote ho

to wo manus si KHushbu

tumhaare gird ek haala banati hai

muqaddas daere mein qaid karti hai

to wo alfaz ko kaghaz pe

moti se chamakte hain

isi manus si KHushbu se

jaane kyun mahakte hain

tumhaare zehn aur dil mein

sukun sa phail jata hai

magar tum kab ye samjhoge

moattar kar rahi hai jo

tumhaari ruh mein bas kar

wo tum mein zam hui hai jo

tumhin mein rahna chahti hai