kachchi basti

galiyāñ

aur galiyoñ meñ galiyāñ

chhoTe ghar

nīche darvāze

TaaT ke parde

mailī bad-rañgī dīvāreñ

dīvāroñ se sar Takrātī

koī gaalī

galiyoñ ke siine par bahtī

gandī naalī

galiyoñ ke māthe par bahtā

āvāzoñ kā ganda naalā

āvāzoñ kī bhiiḌ bahut hai

insānoñ kī bhiiḌ bahut hai

kaḌve aur kasīle chehre

bad-halī ke zahr se haiñ zahrīle chehre

bīmārī se piile chehre

marte chehre

haare chehre

be-bas aur bechāre chehre

saare chehre

ek pahāḌī kachre kī

aur us par phirte

āvāra kuttoñ se bachche

apnā bachpan DhūñD rahe haiñ

din Dhaltā hai

is bastī meñ rahne vaale

auroñ kī jannat ko apnī mehnat de kar

apne jahannam kī jānib

ab thake hue

jhunjhlā.e hue se

lauT rahe haiñ

ek galī meñ

zañg lage piipe rakkhe haiñ

kachchī daarū mahak rahī hai

aaj savere se

bastī meñ

qatl-o-ḳhūñ kā

chāqū-zanī kā

koī qissa nahīñ huā hai

ḳhair

abhī to shaam hai

puurī raat paḌī hai

yuuñ lagtā hai

saarī bastī

jaise ik dukhtā phoḌā hai

yuuñ lagtā hai

saarī bastī

jaise hai ik jaltā kaḌhāv

yuuñ lagtā hai

jaise ḳhudā nukkaḌ par baiThā

TūTe-phūTe insāñ

aune-paune dāmoñ

bech rahā hai!

galiyan

aur galiyon mein galiyan

chhoTe ghar

niche darwaze

TaT ke parde

maili bad-rangi diwaren

diwaron se sar Takraati

koi gali

galiyon ke sine par bahti

gandi nali

galiyon ke mathe par bahta

aawazon ka ganda nala

aawazon ki bhiD bahut hai

insanon ki bhiD bahut hai

kaDwe aur kasile chehre

bad-hali ke zahr se hain zahrile chehre

bimari se pile chehre

marte chehre

haare chehre

be-bas aur bechaare chehre

sare chehre

ek pahaDi kachre ki

aur us par phirte

aawara kutton se bachche

apna bachpan DhunD rahe hain

din Dhalta hai

is basti mein rahne wale

auron ki jannat ko apni mehnat de kar

apne jahannam ki jaanib

ab thake hue

jhunjhlae hue se

lauT rahe hain

ek gali mein

zang lage pipe rakkhe hain

kachchi daru mahak rahi hai

aaj sawere se

basti mein

qatl-o-KHun ka

chaqu-zani ka

koi qissa nahin hua hai

KHair

abhi to sham hai

puri raat paDi hai

yun lagta hai

sari basti

jaise ek dukhta phoDa hai

yun lagta hai

sari basti

jaise hai ek jalta kaDhaw

yun lagta hai

jaise KHuda nukkaD par baiTha

TuTe-phuTe insan

aune-paune damon

bech raha hai!