kaDi dhup se pahaDon tak

mehr-e-tābāñ kī tez kirnoñ se

zarra-zarra hai ātish-paikar

har taraf ek haul-nāk samāñ

har taraf mahv-e-iztirāb insāñ

rāstoñ pe Dagar pe khetoñ pe

chhā gayā hai buḳhār kā ġhalba

kuchh maveshī khaḌe lab-e-dariyā

pī ke āb-e-hayāt baiTh rahe

ho ke pazhmurda sabza-zāroñ se

chal rahī hai havā-e-kaif-āgīñ

gā rahe haiñ ajiib sā naġhma

chiiḌ ke peḌ kho.e-kho.e se

aa rahī hai thakī-thakī sī sadā

sang-rezoñ se ābshāroñ se

ik sukūñ-āfrīñ shajar ke tale

aa ke leTā huā huuñ ghaas pe maiñ

jaise lorī sunā rahā hai koī

jaise har ġham se pā chukā huuñ najāt

jaise har fikr saath chhoḌ chukī

phir kisī ne uThā diyā aakar

is jagah se bhagā diyā aakar

ye sukūñ aur ye pyaar fitrat kā

is zamāne kī yaad meñ shāyad

jab ki insān dast-e-fitrat kā

ḳhūbsūrat sā ik khilaunā thā

jaise maaoñ kī god meñ bachche

aaj ye chain ye sukūn kahāñ

aaj to jangaloñ ke andar bhī

shahr ke kārobār chalte haiñ

aaj jangal kī zindagī ke liye

shahr sab se baḌā darinda hai

mehr-e-taban ki tez kirnon se

zarra-zarra hai aatish-paikar

har taraf ek haul-nak saman

har taraf mahw-e-iztirab insan

raston pe Dagar pe kheton pe

chha gaya hai buKHar ka ghalba

kuchh maweshi khaDe lab-e-dariya

pi ke aab-e-hayat baiTh rahe

ho ke pazhmurda sabza-zaron se

chal rahi hai hawa-e-kaif-agin

ga rahe hain ajib sa naghma

chiD ke peD khoe-khoe se

aa rahi hai thaki-thaki si sada

sang-rezon se aabshaaron se

ek sukun-afrin shajar ke tale

aa ke leTa hua hun ghas pe main

jaise lori suna raha hai koi

jaise har gham se pa chuka hun najat

jaise har fikr sath chhoD chuki

phir kisi ne uTha diya aakar

is jagah se bhaga diya aakar

ye sukun aur ye pyar fitrat ka

is zamane ki yaad mein shayad

jab ki insan dast-e-fitrat ka

KHubsurat sa ek khilauna tha

jaise maon ki god mein bachche

aaj ye chain ye sukun kahan

aaj to jangalon ke andar bhi

shahr ke karobar chalte hain

aaj jangal ki zindagi ke liye

shahr sab se baDa darinda hai