kaDi masafat

us ne mujh se hisāb māñgā hai

'umr-bhar kī kamā.ī ko us kī

maiñ ne kaise kahāñ pe ḳharch kiyā

paa.ī paa.ī kā ab hisāb maiñ duuñ

us kī har baat kā javāb maiñ duuñ

ye to us kī purānī 'ādat hai

kitne barsoñ se sun rahī huuñ magar

jaane kyoñ aaj us kī baat mire

dil meñ ik tiir ban ke utrī hai

lamha bhar ko ye maiñ ne sochā hai

'umr kī is kaḌī masāfat meñ

maiñ ne pūchhā hai ye kabhī us se

vo sarāpā vo ḳhadd-o-ḳhāl mire

kin guphāoñ meñ kho ga.e āḳhir

ghanī zulfeñ darāz resham sī

jhāḌ-jhankār ban ga.iiñ kaise

nail-polish lage jo nāḳhun the

chapTe chapTe se ab hue kaise

jī meñ aatā hai ab kahūñ us se

kabhī maiñ ne hisāb māñgā hai

us ne mujh se hisab manga hai

'umr-bhar ki kamai ko us ki

main ne kaise kahan pe KHarch kiya

pai pai ka ab hisab main dun

us ki har baat ka jawab main dun

ye to us ki purani 'adat hai

kitne barson se sun rahi hun magar

jaane kyon aaj us ki baat mere

dil mein ek tir ban ke utri hai

lamha bhar ko ye main ne socha hai

'umr ki is kaDi masafat mein

main ne puchha hai ye kabhi us se

wo sarapa wo KHadd-o-KHal mere

kin guphaon mein kho gae aaKHir

ghani zulfen daraaz resham si

jhaD-jhankar ban gain kaise

nail-polish lage jo naKHun the

chapTe chapTe se ab hue kaise

ji mein aata hai ab kahun us se

kabhi main ne hisab manga hai