کڑی مسافت

اس نے مجھ سے حساب مانگا ہے

عمر بھر کی کمائی کو اس کی

میں نے کیسے کہاں پہ خرچ کیا

پائی پائی کا اب حساب میں دوں

اس کی ہر بات کا جواب میں دوں

یہ تو اس کی پرانی عادت ہے

کتنے برسوں سے سن رہی ہوں مگر

جانے کیوں آج اس کی بات مرے

دل میں اک تیر بن کے اتری ہے

لمحہ بھر کو یہ میں نے سوچا ہے

عمر کی اس کڑی مسافت میں

میں نے پوچھا ہے یہ کبھی اس سے

وہ سراپا وہ خد و خال مرے

کن گپھاؤں میں کھو گئے آخر

گھنی زلفیں دراز ریشم سی

جھاڑ جھنکار بن گئیں کیسے

نیل پاش لگے جو ناخن تھے

چپٹے چپٹے سے اب ہوئے کیسے

جی میں آتا ہے اب کہوں اس سے

کبھی میں نے حساب مانگا ہے