kaDwe talKH kasile zaiqe

ham shorīda kaḌve talḳh kasīle zā.iqe

raat kī pur-shahvat āñkhoñ se Tapke taaza qatre

shaam ke kaale siyāh māthe kī nañgī maḳhrūtī ḳhārish

dopahroñ ke jalte gosht kī tez bisāñd

raat kī kaalī raan se bahtā andhā laavā

ḳhalīj kī gahrā.ī se bāhar aatā

qadam qadam par ḳhauf tabāhī dahshat paidā kartā

bikhar rahā hai

rātoñ kī sayyāl malāmat apnī lambī zulf bikhere

kaḌve mausam ke jashnoñ meñ naach rahī hai

kaḌve talḳh kasīle zā.iqoñ ke in jashnoñ meñ

gardan tak maiñ pighal gayā huuñ

māthe par in shorīda jashnoñ kī mohreñ sabt huī haiñ

kaḌve zā.iqe joñkeñ ban kar taalū se ab chimaT ga.e haiñ

tez aur tund tezābī sūraj

hāñpte aur karāhte sard makānoñ kī mutvarrim chīḳheñ

mutvarrim sāñsoñ meñ surḳh tashaddud kī chīḳheñ

mere kaan meñ surḳh tashaddud kī chīḳhoñ kī

chhāvniyāñ ābād huī haiñ

ham shorīda kaḌve talḳh kasīle zā.iqe

nau-zā.ida shahroñ ke muñh pe

qatra qatra Tapak rahe haiñ

hum shorida kaDwe talKH kasile zaiqe

raat ki pur-shahwat aankhon se Tapke taza qatre

sham ke kale siyah mathe ki nangi maKHruti KHarish

dopahron ke jalte gosht ki tez bisand

raat ki kali ran se bahta andha lawa

KHalij ki gahrai se bahar aata

qadam qadam par KHauf tabahi dahshat paida karta

bikhar raha hai

raaton ki sayyal malamat apni lambi zulf bikhere

kaDwe mausam ke jashnon mein nach rahi hai

kaDwe talKH kasile zaiqon ke in jashnon mein

gardan tak main pighal gaya hun

mathe par in shorida jashnon ki mohren sabt hui hain

kaDwe zaiqe jonken ban kar talu se ab chimaT gae hain

tez aur tund tezabi suraj

hanpte aur karahte sard makanon ki mutwarrim chiKHen

mutwarrim sanson mein surKH tashaddud ki chiKHen

mere kan mein surKH tashaddud ki chiKHon ki

chhawniyan aabaad hui hain

hum shorida kaDwe talKH kasile zaiqe

nau-zaida shahron ke munh pe

qatra qatra Tapak rahe hain