kahan hain hum

kahāñ the ham

samundar sī kisī ḳhvāhish ke sāhil par

hañstī bhīgtī saa.at kī sangat meñ

hañsī kitnī sajal thī

aañkh ke har kunj meñ

titlī kī sūrat uḌtī phirtī thī

rah-e-shab meñ ghanā jangal

yā koī ajnabī rasta

hamāre sāmne aatā

to us dīvār ke siine se kitne dur nikal aa.e

lahū kī taal par manzil

dhaḌak uThtī thī pahlū meñ

kisī ehsās ke dhuñdle

ufuq se din nikal aatā

aur apne saath kyā kyā

qurmuzī kirnoñ meñ leTe

pyaar ke sandes le aatā

bahut takrīm ke mausam

tah-e-jāñ se ubharte the

duāoñ se bhare

sarsabz hāthoñ ko yaqīñ thā

jhilmilāte ḳhvāb

ḳhushbū-ḳheziyoñ meñ fard hoñge

aur taqarrub ke kisī

betāb se pal ko jagā.eñge

to sarpaT bhāgtī

ye umr kī hirnī

kisī zanjīr-e-va.ada meñ

kahīñ ruk kar

hameñ chāhat se dekhegī

kahāñ haiñ ham

kisī vīrān sāhil par

hamārī aarzū kī kashtiyāñ

auñdhī paḌī haiñ

aur jaise niiñd ke

be-tāb halkore kī zad meñ haiñ

agar sūraj unheñ us niiñd se

āzād karne ke liye

kirnoñ ko koī izn detā hai

to vo āñkhoñ pe

apne haath rakh letī haiñ

gahrī nā-gavārī se

aur ab to

vasl kī mish.al bhī ḳhvābīda hai

sulgan se tahī hai

aur us ke dasht meñ

har sū barābar reshmī ḳhvāboñ kī

niilī raakh uḌtī hai

kahan the hum

samundar si kisi KHwahish ke sahil par

hansti bhigti saat ki sangat mein

hansi kitni sajal thi

aankh ke har kunj mein

titli ki surat uDti phirti thi

rah-e-shab mein ghana jangal

ya koi ajnabi rasta

hamare samne aata

to us diwar ke sine se kitne dur nikal aae

lahu ki tal par manzil

dhaDak uThti thi pahlu mein

kisi ehsas ke dhundle

ufuq se din nikal aata

aur apne sath kya kya

qurmuzi kirnon mein leTe

pyar ke sandes le aata

bahut takrim ke mausam

tah-e-jaan se ubharte the

duaon se bhare

sarsabz hathon ko yaqin tha

jhilmilate KHwab

KHushbu-KHeziyon mein fard honge

aur taqarrub ke kisi

betab se pal ko jagaenge

to sarpaT bhagti

ye umr ki hirni

kisi zanjir-e-wada mein

kahin ruk kar

hamein chahat se dekhegi

kahan hain hum

kisi viran sahil par

hamari aarzu ki kashtiyan

aundhi paDi hain

aur jaise nind ke

be-tab halkore ki zad mein hain

agar suraj unhen us nind se

aazad karne ke liye

kirnon ko koi izn deta hai

to wo aankhon pe

apne hath rakh leti hain

gahri na-gawari se

aur ab to

wasl ki mishal bhi KHwabida hai

sulgan se tahi hai

aur us ke dasht mein

har su barabar reshmi KHwabon ki

nili rakh uDti hai