kahan se tum aae ho bhai

safede ke sumbul ke

aur popular ke chharīre shajar

mirī joh meñ aa.e the jab

mirī sabz dhartī kā ik bhī parinda

unheñ dekhne in kī shāḳhoñ meñ

ārām karne ko tayyār hargiz nahīñ thā

kabhī koī phūle paroñ vaalī

ik phuul sī fāḳhta

in kī shāḳhoñ kī jānib umañDtī

to bū se pareshān ho kar

falak kī taraf tiir ban kar

kuchh is taur jaatī

ki jaise vo vāpas zamīñ par nahīñ aa.egī

aur ab haal ye hai

phulā hī ke kīkar ke berī ke sab peḌ

in aane vāloñ se ghabrā ke

jaane kahāñ chal diye haiñ

ghane sabz shīsham ke chhitnār murjhā ga.e haiñ

agar koī bargad yā pīpal kā

ik aadh haikal

kisī kone khudre meñ

āñkhoñ ko mīche

paroñ ko sameTe khaḌā hai

to kyā hai

use kab kisī aane vaale

chale jaane vaale se koī ta.alluq rahā hai

jo yuuñ hai to aao chaleñ

aane vāloñ se chal kar mileñ

in se pūchheñ

kahāñ se tum aa.e ho bhaa.ī

irāda hai kab tak yahāñ Thaharne kā

safede ke sumbul ke

aur popular ke chharire shajar

meri joh mein aae the jab

meri sabz dharti ka ek bhi parinda

unhen dekhne in ki shaKHon mein

aaram karne ko tayyar hargiz nahin tha

kabhi koi phule paron wali

ek phul si faKHta

in ki shaKHon ki jaanib umanDti

to bu se pareshan ho kar

falak ki taraf tir ban kar

kuchh is taur jati

ki jaise wo wapas zamin par nahin aaegi

aur ab haal ye hai

phula hi ke kikar ke beri ke sab peD

in aane walon se ghabra ke

jaane kahan chal diye hain

ghane sabz shisham ke chhitnar murjha gae hain

agar koi bargad ya pipal ka

ek aadh haikal

kisi kone khudre mein

aankhon ko miche

paron ko sameTe khaDa hai

to kya hai

use kab kisi aane wale

chale jaane wale se koi talluq raha hai

jo yun hai to aao chalen

aane walon se chal kar milen

in se puchhen

kahan se tum aae ho bhai

irada hai kab tak yahan Thaharne ka