kahani

ajab din the vo

jhāḌiyāñ aag ke jhunD kā.ī-zada taal

jin ke kināre hazāroñ baras se khaḌe

jand aur one ke Dhāñche

phulā.ī ke pharvāñ ke jañgal jo dhartī pe bichh se ga.e the

udāsī huā ban ke phirtī thī

aur sunnat sādhū

purāne daraḳhtoñ ke nīche bichhī ghaas par

aaltī pāltī maar kar baiThte the

ḳhud apne hī andar ke tārīk jañgal kā hissa bane the

ajab din the vo

jab bhī kuchh kahnā chāhā

ghuse murda lafzoñ kī koī kumak tak na aa.ī

jo aa.ī to phir hoñT sil se ga.e

aur āñkheñ

na kah sakne ke karb meñ mubtalā ho ke

apne hī halqoñ se bāhar nikal aa.eñ risne lagīñ

aur phir ek din

ūñche-nīche pahāḌoñ se hotā huā vo

yahāñ aa ke Thahrā

yahāñ aa ke us ne

muammar-tarīn one ke nīche vo sho.ala jagāyā

ki jis meñ bhasm ho ga.e sab ye one jhunD pharvāñ phulā.ī

havā ho ga.e sunnat-sādhū kaTī jhāḌiyāñ

aur kā.ī-zada taal dhartī ke nāsūr

ab un kā nām-o-nishāñ bhī nahīñ thā

tab us ne

muqaddas asā se vo jaadū jagāyā ki saarī fazā sail-e-anvār meñ bah ga.ī

ghoñsloñ aur phūloñ meñ Dhaltī ga.ī ye zamīñ

chahchahoñ ḳhushbuoñ se havā aT ga.ī

aaj vo lauT kar jā chukā hai

to phir kaalī dhartī ke andar se aag aa.e haiñ

janD ke peḌ kāñToñ-bharī jhāḌiyāñ

phir se risne lage haiñ

vo kā.ī-zada taal

jin ke andar se

manhūs sādhū nikal kar kināroñ pe baiThe hue haiñ

udāsī huā ban ke phirne lagī hai

kisī ne alaav pe bhārī qadam kyā rakhā hai

añdhere kā bojhal sā paT khul gayā hai

fazā bujh ga.ī hai

fazā bujh ga.ī hai

magar kor āñkhoñ ko kaise dikhā.ūñ

ki us bhārī paañv ke nīche

añdhere ke bojhal se is paT ke pīchhe

kiran apne bastoñ pe lipTī huī hai

sunahrī se ik biij meñ so rahī hai

ajab din the wo

jhaDiyan aag ke jhunD kai-zada tal

jin ke kinare hazaron baras se khaDe

jand aur one ke Dhanche

phulai ke pharwan ke jangal jo dharti pe bichh se gae the

udasi hua ban ke phirti thi

aur sunnat sadhu

purane daraKHton ke niche bichhi ghas par

aalti palti mar kar baiThte the

KHud apne hi andar ke tarik jangal ka hissa bane the

ajab din the wo

jab bhi kuchh kahna chaha

ghuse murda lafzon ki koi kumak tak na aai

jo aai to phir honT sil se gae

aur aankhen

na kah sakne ke karb mein mubtala ho ke

apne hi halqon se bahar nikal aaen risne lagin

aur phir ek din

unche-niche pahaDon se hota hua wo

yahan aa ke Thahra

yahan aa ke us ne

muammar-tarin one ke niche wo shoala jagaya

ki jis mein bhasm ho gae sab ye one jhunD pharwan phulai

hawa ho gae sunnat-sadhu kaTi jhaDiyan

aur kai-zada tal dharti ke nasur

ab un ka nam-o-nishan bhi nahin tha

tab us ne

muqaddas asa se wo jadu jagaya ki sari faza sail-e-anwar mein bah gai

ghonslon aur phulon mein Dhalti gai ye zamin

chahchahon KHushbuon se hawa aT gai

aaj wo lauT kar ja chuka hai

to phir kali dharti ke andar se aag aae hain

janD ke peD kanTon-bhari jhaDiyan

phir se risne lage hain

wo kai-zada tal

jin ke andar se

manhus sadhu nikal kar kinaron pe baiThe hue hain

udasi hua ban ke phirne lagi hai

kisi ne alaw pe bhaari qadam kya rakha hai

andhere ka bojhal sa paT khul gaya hai

faza bujh gai hai

faza bujh gai hai

magar kor aankhon ko kaise dikhaun

ki us bhaari panw ke niche

andhere ke bojhal se is paT ke pichhe

kiran apne baston pe lipTi hui hai

sunahri se ek bij mein so rahi hai