kahani ka saman

mirī pyārī annā merī annā jaanī

sunā de mujhe koī aisī kahānī

ki jis meñ paristān kā sā samāñ ho

zamīñ phuul kī chāñd kā āsmāñ ho

sitāre baraste hoñ jis kī fazā meñ

ho ḳhushbū kā tūfān jis kī havā meñ

jahāñ shahd-o-sharbat kī nahreñ ravāñ hoñ

jahāñ hiire yāqūt kī kashtiyāñ hoñ

aur un meñ koī giit gaatī hoñ pariyāñ

shuāoñ ke barbat bajātī hoñ pariyāñ

pahāḌ us meñ jitne hoñ saare tilā.ī

aur un ke suhāne nazāre tilā.ī

añdherā na ho naam ko bhī jahāñ meñ

ho ik chāñd raushan har ik sham.a-dāñ meñ

mahal ho har ik sañg-e-marmar kā jis meñ

har ik taaq ho la.al-o-gauhar kā jis meñ

na būḌhā ho koī na koī javāñ ho

faqat maiñ huuñ aur merī annā vahāñ ho

mire par hoñ uḌtā phirūñ maiñ havā meñ

hukūmat ho merī vahāñ kī fazā meñ

ġharaz merī annā mirī annā jaanī

sunā de mujhe koī aisī kahānī

meri pyari anna meri anna jaani

suna de mujhe koi aisi kahani

ki jis mein paristan ka sa saman ho

zamin phul ki chand ka aasman ho

sitare baraste hon jis ki faza mein

ho KHushbu ka tufan jis ki hawa mein

jahan shahd-o-sharbat ki nahren rawan hon

jahan hire yaqut ki kashtiyan hon

aur un mein koi git gati hon pariyan

shuaon ke barbat bajati hon pariyan

pahaD us mein jitne hon sare tilai

aur un ke suhane nazare tilai

andhera na ho nam ko bhi jahan mein

ho ek chand raushan har ek shama-dan mein

mahal ho har ek sang-e-marmar ka jis mein

har ek taq ho lal-o-gauhar ka jis mein

na buDha ho koi na koi jawan ho

faqat main hun aur meri anna wahan ho

mere par hon uDta phirun main hawa mein

hukumat ho meri wahan ki faza mein

gharaz meri anna meri anna jaani

suna de mujhe koi aisi kahani