kahani

bachcho, ham par hañsne vālo, aao, tumheñ samjhā.eñ

jis ke liye is haal ko pahuñche, us kā naam batā.eñ

rūp-nagar kī ik raanī thii, us se huā lagāv

bachcho, us raanī kī kahānī sun lo aur so jaao

us par marnā, aa.heñ bharnā, ronā, khuḌhnā, jalnā

āb-o-havā par zinda rahnā, añgāroñ par chalnā

ham jañgal jañgal phirte the us ke liye dīvāne

rishī bane, majnūñ kahlā.e, lekin haar na maane

barsoñ kyā kyā chane chabā.e, kyā kyā pāpaḌ bele

lahroñ ko hamrāz banāyā, tūfānoñ se khele

daftar bhūle, bistar bhūle, piine lage sarāb

pal bhar aañkh lage, to aa.eñ ulTe sīdhe ḳhvāb

niiñd meñ kyā kyā dekheñ, taḌpeñ, ro.eñ, uTh uTh jaa.eñ

so jaane kī golī khā.eñ, injection lagvā.eñ

āḳhir vo ik ḳhvāb meñ aa.ī sun ke hamārā haal

koyal jaisī baat thī us kii, hirnī jaisī chaal

kahne lagī, koī jii, terā haal na dekhā jaa.e

maiñ ne kahā ki raanī apnī parjā ko bahlā.e

kahne lagī ki tū kyā legā: sonā, chāndī, haar

maiñ ne kahā ki rānī, tere mukhḌe kī talvār

phir dil ke āñgan meñ utrā us kā saarā ruup

us chehre kī shītal kirneñ, us mukhḌe kī dhuup

dhuup paḌī, to khul ga.ī āñkheñ, khul gayā saarā bhed

ġhash khāyā, to dauḌe aa.e munshī, panDit, ved

vo din hai aur aaj kā din hai chhuT gayā khānā paanī

chhuT gayā khānā pānī, bachcho, ho ga.ī ḳhatm kahānī

merī kahānī meñ lekin ik bhed hai, us ko paao

chāñd ko duur hī duur se dekho chāñd ke paas na jaao

na apne ghar hī us ko bulāo

bachcho, hum par hansne walo, aao, tumhein samjhaen

jis ke liye is haal ko pahunche, us ka nam bataen

rup-nagar ki ek rani thi, us se hua lagaw

bachcho, us rani ki kahani sun lo aur so jao

us par marna, aahen bharna, rona, khuDhna, jalna

aab-o-hawa par zinda rahna, angaron par chalna

hum jangal jangal phirte the us ke liye diwane

rishi bane, majnun kahlae, lekin haar na mane

barson kya kya chane chabae, kya kya papaD bele

lahron ko hamraaz banaya, tufanon se khele

daftar bhule, bistar bhule, pine lage sarab

pal bhar aankh lage, to aaen ulTe sidhe KHwab

nind mein kya kya dekhen, taDpen, roen, uTh uTh jaen

so jaane ki goli khaen, injection lagwaen

aaKHir wo ek KHwab mein aai sun ke hamara haal

koyal jaisi baat thi us ki, hirni jaisi chaal

kahne lagi, koi ji, tera haal na dekha jae

main ne kaha ki rani apni parja ko bahlae

kahne lagi ki tu kya lega: sona, chandi, haar

main ne kaha ki rani, tere mukhDe ki talwar

phir dil ke aangan mein utra us ka sara rup

us chehre ki shital kirnen, us mukhDe ki dhup

dhup paDi, to khul gai aankhen, khul gaya sara bhed

ghash khaya, to dauDe aae munshi, panDit, wed

wo din hai aur aaj ka din hai chhuT gaya khana pani

chhuT gaya khana pani, bachcho, ho gai KHatm kahani

meri kahani mein lekin ek bhed hai, us ko pao

chand ko dur hi dur se dekho chand ke pas na jao

na apne ghar hi us ko bulao