kahi an-kahi

lafz tasvīreñ banāte tire hoñToñ se uThe the lekin

dekhte dekhte tahlīl hue

un kī hiddat mirī rag rag meñ ravāñ thī so rahī

phir tire hāthoñ kā lams aise mulā.em alfāz

terī āñkhoñ kī chamak raushan o mub.ham alfāz

aur vo lafz jo lafzoñ meñ nihāñ rahte haiñ

aur vo lafz ki iz.hār ke muhtāj nahīñ

phir bhī haiñ un ke liye gosh-bar-āvāz sabhī

un ke hamrāz sabhī

sab sune maiñ ne magar āḳhir-e-kār

sabhī tahlīl hue

lafz phir ruup badal kar mire dil meñ larze

shauq-e-iz.hār meñ be-tāb hue

lafz iz.hār meñ sūrat hī badal lete haiñ

jaane kyā baat thī kyā samjhe log

har koī apne hī lafzoñ meñ magan

har koī apne hī ras-rañg meñ gum

har koī apne hī āhañg meñ gum

aur phir lafz ki rahte haiñ gurezāñ ḳhud se

kaun suntā hai unheñ? kaun samajhtā hai unheñ?

jaane kyā baat thī kyā tū ne sunī

apne iz.hār pe nādim thā pashemān thā maiñ

apnī hī baat pe hairān thā maiñ

phir mirī baat bhī tahlīl huī

jaise tū bhuul ga.ī jaise jahāñ bhuul gayā

aur ab maiñ huuñ vo ik lafz-e-ġharīb

koī pūchhe bhī to chup rahtā huuñ

lafz taswiren banate tere honTon se uThe the lekin

dekhte dekhte tahlil hue

un ki hiddat meri rag rag mein rawan thi so rahi

phir tere hathon ka lams aise mulaem alfaz

teri aankhon ki chamak raushan o mubham alfaz

aur wo lafz jo lafzon mein nihan rahte hain

aur wo lafz ki izhaar ke muhtaj nahin

phir bhi hain un ke liye gosh-bar-awaz sabhi

un ke hamraaz sabhi

sab sune main ne magar aaKHir-e-kar

sabhi tahlil hue

lafz phir rup badal kar mere dil mein larze

shauq-e-izhaar mein be-tab hue

lafz izhaar mein surat hi badal lete hain

jaane kya baat thi kya samjhe log

har koi apne hi lafzon mein magan

har koi apne hi ras-rang mein gum

har koi apne hi aahang mein gum

aur phir lafz ki rahte hain gurezan KHud se

kaun sunta hai unhen? kaun samajhta hai unhen?

jaane kya baat thi kya tu ne suni

apne izhaar pe nadim tha pasheman tha main

apni hi baat pe hairan tha main

phir meri baat bhi tahlil hui

jaise tu bhul gai jaise jahan bhul gaya

aur ab main hun wo ek lafz-e-gharib

koi puchhe bhi to chup rahta hun