kahin aur hi chalna hoga

mere gītoñ meñ mohabbat ne jalā.e haiñ charāġh

aur yahāñ zulmat-e-zardār ke ghere haiñ tamām

sab ke hoñToñ pe havasnāk umīdoñ kī barāt

koī letā nahīñ ulfat bhare gītoñ kā salām

ai mire giit! kahīñ aur hī chalnā hogā

tujh ko ma.alūm nahīñ aadam o havvā kī zamīñ

apne nāsūr ko parde meñ chhupāne ke liye

gul kiye detī hai afkār ke ma.asūm charāġh

har nafas apne garebān pe rakhtī hai nazar

jis meñ ik taar bhī baaqī nahīñ parde ke liye

ai mire giit! kahīñ aur hī chalnā hogā

aa kahīñ aur kisī desh ko DhūñDeñ chal kar

ho jahāñ bhuuk na afkār ke pardoñ pe muhīt

vaqt Daale na jahāñ qaid meñ fikroñ kā jamāl

pyaar ke bol ko apnā.e jahāñ saarī zamīñ

aa usī desh meñ phailā.ūñ tire pyaar kā nuur

ai mire giit! kahīñ aur hī chalnā hogā

ye bhī mumkin hai ki jholī meñ amal kī ik roz

yaas kī ḳhaak ho aur duur ho apnī manzil

ārzūoñ kā koī desh na mil paa.e agar

mere siine meñ utar jā ki yahāñ koī nahīñ

jo tire nuur ko paiġhām ko samjhe aa kar

ai mire giit kahīñ aur hī chalnā hogā

mere giton mein mohabbat ne jalae hain charagh

aur yahan zulmat-e-zardar ke ghere hain tamam

sab ke honTon pe hawasnak umidon ki baraat

koi leta nahin ulfat bhare giton ka salam

ai mere git! kahin aur hi chalna hoga

tujh ko malum nahin aadam o hawwa ki zamin

apne nasur ko parde mein chhupane ke liye

gul kiye deti hai afkar ke masum charagh

har nafas apne gareban pe rakhti hai nazar

jis mein ek tar bhi baqi nahin parde ke liye

ai mere git! kahin aur hi chalna hoga

aa kahin aur kisi desh ko DhunDen chal kar

ho jahan bhuk na afkar ke pardon pe muhit

waqt Dale na jahan qaid mein fikron ka jamal

pyar ke bol ko apnae jahan sari zamin

aa usi desh mein phailaun tere pyar ka nur

ai mere git! kahin aur hi chalna hoga

ye bhi mumkin hai ki jholi mein amal ki ek roz

yas ki KHak ho aur dur ho apni manzil

aarzuon ka koi desh na mil pae agar

mere sine mein utar ja ki yahan koi nahin

jo tere nur ko paigham ko samjhe aa kar

ai mere git kahin aur hi chalna hoga