kahna ye tha

jaane kahāñ ho

daftar ke murda māhaul meñ

doġhle logoñ ke jhurmuT meñ

shahar kī bāhoñ ke zālim halqe se bāhar

chauḌī shah-rāhoñ ke tapte siine par chup-chāp ravāñ ho

yā kisī tah-ḳhāne kī ThanDak ke mehmāñ ho

mobile kā saaf javāb hai

aap ke matlūba number se koī javāb nahīñ miltā hai

kahnā ye thā

ye computer aaj mirī ḳhvārī par phir āmāda hai

net kā rābta juḌ nahīñ paatā

juḌ jaa.e to pal se ziyāda rukne ko tayyār nahīñ hai

kaun sā icon dabā.ūñ to ye sarkash ghoḌā qaabū meñ aa.egā

kis number par phone karūñ to koī madad kī sūrat hogī

modem bāġhī ho baiThā hai

server baat nahīñ suntā

web kī ragoñ meñ ḳhuun jamā hai

kone par ik ghūmtī duniyā ke mehvar par zang lagā hai

jaane kahāñ ho

kisī shajar kī bāham paivasta shāḳhoñ se raah banā kar

bijlī ke khamboñ tāroñ

yā dīvāroñ ke kaan se ho kar

shāyad koī bhūlā-bhaTkā signal tum ko DhūñD nikāle

aur batlā de

paas na ho tum to maiñ saare aalam se kaT jaatī huuñ

duniyā merī muTThī meñ se ret kī sūrat bah jaatī hai

duniyā bhar se mere rābte bas tum se haiñ

rābta rakhnā

jaane kahan ho

daftar ke murda mahaul mein

doghle logon ke jhurmuT mein

shahar ki bahon ke zalim halqe se bahar

chauDi shah-rahon ke tapte sine par chup-chap rawan ho

ya kisi tah-KHane ki ThanDak ke mehman ho

mobile ka saf jawab hai

aap ke matluba number se koi jawab nahin milta hai

kahna ye tha

ye computer aaj meri KHwari par phir aamada hai

net ka rabta juD nahin pata

juD jae to pal se ziyaada rukne ko tayyar nahin hai

kaun sa icon dabaun to ye sarkash ghoDa qabu mein aaega

kis number par phone karun to koi madad ki surat hogi

modem baghi ho baiTha hai

serwer baat nahin sunta

web ki ragon mein KHun jama hai

kone par ek ghumti duniya ke mehwar par zang laga hai

jaane kahan ho

kisi shajar ki baham paiwasta shaKHon se rah bana kar

bijli ke khambon taron

ya diwaron ke kan se ho kar

shayad koi bhula-bhaTka signal tum ko DhunD nikale

aur batla de

pas na ho tum to main sare aalam se kaT jati hun

duniya meri muTThi mein se ret ki surat bah jati hai

duniya bhar se mere rabte bas tum se hain

rabta rakhna