kaif

yahāñ sajda vahāñ sajda na ka.aba hai na but-ḳhāna

na jaane kar rahā hai kyā kisī mastī meñ mastāna

pilā de mujh ko saaqī tū yuuñ paimāna-ba-paimāna

nazar aa.e tirī duniyā mujhe bas ek paimāna

mujhe lagtā hai ab sāġhar bhī jaise ek mai-ḳhāna

nigāh-e-ḳhās hai jab se tirī ai pīr-e-mai-ḳhāna

ajab tū hai ajab mai hai ajab sā terā mai-ḳhāna

nahīñ saaqī koī lekin bharā jaatā hai paimāna

huā jaatā hai ḳhālī zindagī kā aise paimāna

sahar tak jaise suunā hotā jaa.e koī mai-ḳhāna

na ab mai hai na mai-kash hai na saaqī hai na mai-ḳhāna

piye jaatā hai lekin koī paimāna-ba-paimāna

yahāñ phirte haiñ TuuTā sā liye hāthoñ meñ paimāna

vahāñ muddat se detā hai sadā.eñ koī mai-ḳhāna

tirā dast-e-shafīqāna tirī nazar-e-karīmāna

yahī hai mudda.ā merā yahī arz-e-ġharībāna

tirī mahfil se jaa.e to kahāñ jaa.e ye dīvāna

ye kahtā phir rahā hai har taraf mahfil meñ mastāna

idhar sajda udhar sajda na sūrat hai na mūrat hai

ajab aalam liye phirtā hai apne meñ ye dīvāna

kiye jaatā hai bas sajde na ye dekhe na vo dekhe

kisī sūrat nahīñ suntā kisī kī terā mastāna

tujhe dekhūñ to kyā dekhūñ tire jalvoñ se vāqif huuñ

yahī kahtā rahā shab bhar tirī mahfil meñ dīvāna

tirā dariyā hai maiñ huuñ aur hai ab Duub kar jaanā

kare karnā hai jo bhī ab tirā taur-e-karīmāna

mujhe de de tū ik qatra hī mai-ḳhāne se ai saaqī

nahīñ detā na de mujh ko tū paimāna-ba-paimāna

kisī kā dar ho sajde hoñ zabāñ chup aañkh meñ aañsū

kahāñ aate haiñ shāhoñ ko ye ādāb-e-faqīrāna

yahan sajda wahan sajda na kaba hai na but-KHana

na jaane kar raha hai kya kisi masti mein mastana

pila de mujh ko saqi tu yun paimana-ba-paimana

nazar aae teri duniya mujhe bas ek paimana

mujhe lagta hai ab saghar bhi jaise ek mai-KHana

nigah-e-KHas hai jab se teri ai pir-e-mai-KHana

ajab tu hai ajab mai hai ajab sa tera mai-KHana

nahin saqi koi lekin bhara jata hai paimana

hua jata hai KHali zindagi ka aise paimana

sahar tak jaise suna hota jae koi mai-KHana

na ab mai hai na mai-kash hai na saqi hai na mai-KHana

piye jata hai lekin koi paimana-ba-paimana

yahan phirte hain TuTa sa liye hathon mein paimana

wahan muddat se deta hai sadaen koi mai-KHana

tera dast-e-shafiqana teri nazar-e-karimana

yahi hai muddaa mera yahi arz-e-gharibana

teri mahfil se jae to kahan jae ye diwana

ye kahta phir raha hai har taraf mahfil mein mastana

idhar sajda udhar sajda na surat hai na murat hai

ajab aalam liye phirta hai apne mein ye diwana

kiye jata hai bas sajde na ye dekhe na wo dekhe

kisi surat nahin sunta kisi ki tera mastana

tujhe dekhun to kya dekhun tere jalwon se waqif hun

yahi kahta raha shab bhar teri mahfil mein diwana

tera dariya hai main hun aur hai ab Dub kar jaana

kare karna hai jo bhi ab tera taur-e-karimana

mujhe de de tu ek qatra hi mai-KHane se ai saqi

nahin deta na de mujh ko tu paimana-ba-paimana

kisi ka dar ho sajde hon zaban chup aankh mein aansu

kahan aate hain shahon ko ye aadab-e-faqirana