kaifiyat

ai nigāh-e-mast apnā sā hī mastāna banā

mai banā de ruuh ko aur jaañ ko paimāna banā

kaif-o-mastī kā banā de jaam dast-e-shauq meñ

luuT le jo mai-kada vo pīr-e-mai-ḳhāna banā

faiz par tere nigāh-e-faiz hai ye munhasir

jis ko chāhe jaise chāhe apnā dīvāna banā

ḳhud se begāna banā de kaif-o-mastī chhīn le

lau meñ sham-e-ishq kī jal jā.ūñ parvāna banā

muntashir kar de banā kar har taraf apnī mahak

mere afsāne ko afsānoñ kā afsāna banā

fāsla rakh utnā apne aur mere darmiyāñ

koī na samjhe ki kis kā kaun dīvāna banā

sāmne aa.uuñ tire to kapkapāte hoñT hoñ

tarz-e-minnat ko mirī tū taur-e-tiflāna banā

jān-o-tan se ruuh ke rishtoñ kī vus.at dekh lī

dil mirā pahlū meñ rah kar mujh se begāna banā

kitnā ai sāqi-e-mai-ḳhāna tirā mamnūn huuñ

lutf se tere hī merā azm rindāna banā

phūñk de ik ruuh jān-o-tan meñ apne ishq kī

ye na pūchh 'ashraf' se kaise terā dīvāna banā

ai nigah-e-mast apna sa hi mastana bana

mai bana de ruh ko aur jaan ko paimana bana

kaif-o-masti ka bana de jam dast-e-shauq mein

luT le jo mai-kada wo pir-e-mai-KHana bana

faiz par tere nigah-e-faiz hai ye munhasir

jis ko chahe jaise chahe apna diwana bana

KHud se begana bana de kaif-o-masti chhin le

lau mein sham-e-ishq ki jal jaun parwana bana

muntashir kar de bana kar har taraf apni mahak

mere afsane ko afsanon ka afsana bana

fasla rakh utna apne aur mere darmiyan

koi na samjhe ki kis ka kaun diwana bana

samne aaun tere to kapkapate honT hon

tarz-e-minnat ko meri tu taur-e-tiflana bana

jaan-o-tan se ruh ke rishton ki wusat dekh li

dil mera pahlu mein rah kar mujh se begana bana

kitna ai saqi-e-mai-KHana tera mamnun hun

lutf se tere hi mera azm rindana bana

phunk de ek ruh jaan-o-tan mein apne ishq ki

ye na puchh 'ashraf' se kaise tera diwana bana